Behar Mera: Dibrançja ime që vuri në siklet Rita Latin

Izaura Ndoj

Behar Mera, është një emër i dashur për publikun shqiptar. Humori dhe karakteri i tij e identifikojnë si ikonë e humorit dhe skenës shqiptar gjatë dy dekadave. Në një intervistë për “Summer Time” aktori i humorit Behar Mera, rrëfen fillimet e tij në skenë, bashkëpunimin me partneren besnike të skenës Rita Latin, dashurinë për familjen si dhe projektet që do ta ndjekin në vazhdim. Edhe pse artistë me shpirt, ai në këtë intervistë tregon se mbi të gjitha është babai i dy vajzave, Edrës dhe Ivës, dhe një bashkëshort i përkushtuar. Aktori i humorit dhe skenës shqiptare Behar Mera, ka realizuar mbi 25 albume dhe ka marrë pjesë në shumë kinokomedi dhe filma të realizuar nga regjisorët më të mirë të Shqipërisë. Ndër videokasetat e tij më të mira janë: “Shoku Taip”, “Zoti pallosh”, “Të na rroj komshiu”, “Një kokërr fik”, “Koqe kandari”, etj.. Ka interpretuar edhe në disa filma të njohur artistikë me regjisorët më të njohur Edmond Budina dhe Fatmir Koçi. Ndër këto filma spikat roli i tij te filmi “Tirana, viti zero”.

Përshëndetje Behar! Sapo jeni kthyer nga një eksperiencë në Australi. Mund të na flisni pak mbi këtë aktivitet?

Po është e vërtetë. Ka disa ditë që jam kthyer nga një vend i mrekullueshëm si Australia. Edhe pse për një periudhë të shkurtër dy javore arrita të vizitoj pak nga mrekullitë e Australisë. Nga bashkatdhetarët ishin organizuar 4 koncerte në të cilat unë isha i ftuar mes disa artistëve të tjerë si, Rita Lati, Mariola Kacani, Jurgen Kacani, dhe klarinetisti virtuoz Nevruz Vengo. Jam larguar nga ai vend me kujtime dhe eksperienca të jashtëzakonshme, me një ndjenjë malli dhe dashurie për ato shqiptarë të mrekullueshëm që na pritën e na shoqëruan gjatë gjithë atyre ditëve me një kënaqësi të veçantë. Këto aktivitete do të mbeten të paharrueshme për jetën time.

Jeni cilësuar si ikona e humorit shqiptar për më shumë se 2 dekada. Si ndiheni nga ky vlerësim?

Faleminderit! Unë i jam mirënjohës publikut shqiptarë anë e mbanë globit që ka vlerësuar humorin tim dhe pa diskutim që fjalët nuk arrijnë ta tregojnë lumturinë dhe kënaqësinë time. Ju duhet ta dini që duartrokitjet dhe vlerësimi i publikut dhe fansave  nxisin pasionin e udhëtimit të një artisti.

Ju fëmijërinë tuaj e keni kaluar në qytetin e veriut. Edhe fëmijë jeni karakterizuar si natyrë me humor?

(Qesh) natyrisht që po, që në moshë fare të vogël kisha dëshirë të recitoja, tregoja barcaleta dhe të imitoja. Përkrahësi, kritikuesi, vlerësuesi im më i fuqishëm në atë moshë megjithëse të vogël ishte pasqyra...me të cilën komunikoja shumë. Por, në fakt është e çuditshme kur e kujtoj tani pasi talenti im nuk spikaste vetëm në zhanrin e humorit e të aktrimit por edhe në atë të muzikës. Unë studioja për veglën muzikore trompe, dhe këndoja shumë bukur.

Si e kujtoni daljen tuaj të parë dhe marrjen e duartrokitjeve të publikut?

Mbaj mend kur mbusha 19 vjeç preka për herë të parë skenën në gjininë e humorit. përjetova emocione të jashtëzakonshme dhe mora duartrokitje të zjarrta që në herën e parë të daljes time në skenë. Skena, kur je në moshë kaq të re si me magji të krijon shumë personalitet dhe vendosmëri në jetën artistike. Edhe për mua ato kujtime nxiten dëshirën dhe pasionin për të vazhduar rrugën e bukur të vështirë dhe të suksesshme të aktrimit.

Partnerja juaj besnike e skenës është Rita Lati. Si i keni raportet mendoni se do vazhdoni akoma bashkëpunimin artistik me të?

Po është e vërtetë, me Ritën kam luajtur dhe interpretuar më shumë role se me këdo artist tjetër. Ndoshta sepse kur bën humor e ndjen të nevojshme ekzistencën e një partneri në krah qoftë mashkull apo femër. Nevoja e të qenit çift në skenë të bën që të zgjedhësh partner ose partneren  e duhur për ty, unë zgjodha Ritën. Bashkëpunimi ynë në skenë solli sukses dhe pëlqim nga publiku, kështu që në do vazhdojmë të japim edhe në të ardhmen atë që pëlqejnë artdashësit.

Cili ka qenë momenti më i vështirë që jeni ndodhur në skenë apo para kamerave...Po në jetën familjare?

Në skenë kam pasur vetëm momente të bukura sepse skena është shtëpia ime. Më komod rri në skenës sesa në shtëpi (qesh), ndërsa për sa i përket marrëdhënies time me kamerën në fillim ka qenë e vështirë ashtu siç është për këdo, por më pas kamera u bë miku im më i mirë. Përsa i përket jetës familjare, gjej rastin të falënderojë publikisht familjen time që më ka mbështetur dhe më ka krijuar një atmosferë të ngrohtë e të qetë për të cilin artisti ka shumë nevojë.

Po momenti më i veçantë?

Momente të veçanta janë shumë dhe kur janë shumë s’janë më të veçanta. Tani që po bëni këtë pyetje më vjen ndër mend një dialog me Ritën përpara një publiku dibran. Sapo nisi dialogu në skenë, unë gjithçka e transformova në gjuhën dibrane, dhe Rita si një vlonjate që është ngeli në skenë dhe bënte vetëm eeee duke mbajtur iso? Kemi qeshur me lot më pas.

Përveç karrierës si artist, keni ndonjë profesion që ushtroni ose biznes?

Jo, jam përkushtuar tërësisht artit, ndoshta më vonë mund të merrem dhe me diçka tjetër ku i dihet na shtohen fuqitë, mund të merremi dhe me dy-tre punë.

Po familja sa ju ka mbështetur në këtë rrugë të gjatë. Bashkëshortja dhe dy vajzat ju kanë ndjekur në çdo sukses?

Zoti më ka dhuruar dy vajza, Edrën dhe Ivën. I kemi rritur pa diskutim njësoj me shumë dashuri dhe përkushtim. Por, jo të dyja janë njësoj, madje shumë të kundërta. Edra, vajza e madhe është natyrë e qetë, e thjeshtë dhe i ngjan shumë nënës së saj me karakter të fortë e sportive. Ndërsa, Iva është më çapkëne dhe e hedhur ashtu siç janë vajzat e vogla në familje. Orientimin e ka drejt artit edhe pse unë shumë herë nuk ja kam ushqyer. Tek Iva shoh një pjesë të vetes time, ka humor dhe është e zgjuar.

Po njohja me bashkëshorten si ndodhi. Mendoni se keni gjetur njeriun ideal. Na tregoni pak rreth martesës?

Jetonim në një qytet të vogël në të cilin të gjithë njohin njeri-tjetrin. Besa, bashkëshortja ime për mua ishte vajza më e veçantë e atij qyteti. Ajo ishte volejbolliste me ekipin e “Korabit” dhe unë fansi i saj kryesor, ku edhe kur humbte pikët unë thërrisja fort bravo Besa, (qesh). E kam thënë dhe herë të tjera të gjesh bashkëshorten e duhur në jetë është fat, dhe unë e pata këtë fat.

Keni menduar të hiqni dorë nga humori?

Nuk është zgjedhje e imja të heq dorë nga humori, pasi ai rrjedh nga brendësia e shpirtit tim.

 Ju udhëtoni shumë nëpër koncerte të ndryshme jashtë trojeve shqiptare. Është fitimprurës ky profesion për një artist?

Aktivitetet jashtë Shqipërisë të përcjellin emocione të veçanta sepse ke kontakt me shqiptarët që jetojnë jashtë Shqipërisë. Kjo pjesë e shoqërisë ka shumë mall dhe nevojë për ne. Por, pa diskutim që dhe shpërblimi është pjesë e kësaj eksperience.

Cilat janë projektet që do t’iu ndjekin gjatë muajve në vazhdim?

Përpara na pret një sezon veror ku do të jemi të pranishëm në shumë vende bregdetare, me këtë rast edhe kemi mundësi të marrim rreze dielli e të pushojmë. Projektet për në muajt në vazhdim janë të shumta ku mund të përmend, xhirimin e një filmi komik të TVSH-s, koncerte me rastin e 100-vjetorit të Pavarësisë në Amerikë, përgatitja e programit të vitit të ri në Televizionin Publik Shqiptarë, si dhe një udhëtim tjetër jashtë kontinentit.