Shtetet e Bashkuara të Amerikës, lindja e një pavarësie, shugurimi i një Zoti tokësor
Më 4 korrik 1776, lindi ajo që nga shumëkush sot, quhet
demokracia më e madhe e botës. Sot, shënohet 236-vjetori i Pavarësisë së
Shteteve të Bashkuara të Amerikës
"Amerika e bukur", "Shtëpia e lirë dhe e të
guximshmeve", "Toka e mundësisë", “America the beautiful”, “Home of the free
and the brave”, “The land of opportunity”, këto janë frazat që ne do të
dëgjojmë në mënyrë të pashmangshme në këtë 4 korrik, që vjen si një kremtim
solemn teksa Shtetet e Bashkuara po festojnë, sot përvjetorin e 236-të, kur u
deklarua pavarësia e saj. Nuk ka asnjë dyshim që ky është një festim madhështor
patriotik...
Dita Kombëtare e SHBA
Çdo vit, më 4 korrik amerikanët festojnë së bashku me familjet e tyre, lirinë dhe pavarësinë me piknikë
dhe tubime familjare. Autoritetet, shtetërore dhe federale kanë mobilizuar
mijëra oficerë të policisë për të patrulluar rrugët dhe sheshet e qendrave të
banuara. Forca të tjera të ruajtjes së rendit do të ruajnë hotelet dhe pikat tërheqëse
për turistët. Miliona njerëz, si për shembull, në New York, dhe në disa shtete
të SHBA do të jenë në gjendje të gëzojnë sonte spektaklin e mahnitshëm me fishekzjarrë,
i cili është mbresëlënës sonte. Aktivitetet lidhur me ditën e pavarësisë
përfshijnë dhe garat dhe ngjarjet sportive, e koncerte në skena të hapura me
këngëtarë nga më të njohurit në SHBA.
Dokumenti i 13 kolonive
Deklarata e Pavarësisë është një dokument, nëpërmjet të
cilit 13 kolonitë e Mbretërisë së Bashkuar nga Amerika e Veriut shpallën veten
të pavarur nga Mbretëria e Bashkuar. Dokumenti u ratifikua nga Kongresi
Kontinental më 4 korrik, 1776. Deklarata e Pavarësisë është një nga simbolet e
lirisë, dhe më të dashura e të nderuara të Shteteve të Bashkuara. 236-vjetori i
Ditës së Pavarësisë së Shteteve të Bashkuara të Amerikës, ose Ditëlindja e
Amerikës! Kjo është dita kur lindi Deklarata e Pavarësisë dhe Kushtetuta
amerikane, është ditë gëzimi, jo vetëm e amerikanëve, por edhe e kombit
shqiptar.
Sot, më 4 korrik 2012, u mbushën 236 vjet nga dita që kur
burrat më të ndritur të kombit amerikan nënshkruan Deklaratën e Pavarësisë,
duke u betuar, ashtu siç thuhet edhe në deklaratë, për nderin e tyre, të kombit,
të cilit ata i përkisnin. Kushtetuta amerikane e nënshkruar në vitin 1787,
përshkruan bazën dhe strukturën e qeverisë të Shteteve të Bashkuara, e cila
është e ndarë në tri degë, në ato ekzekutive, legjislative dhe juridike, që në
një gjuhë më të thjeshtë janë Presidenti, Kongresi dhe Gjykata e Lartë.
Liri-Demokraci
Kur gjatë luftës për çlirimin e Kosovës shtrohej pyetja pse
amerikanët duhet të vdesin për Kosovën, natyrshëm dilte përgjigjja e këtij
kombi të madh: se burrat më të ndritur të këtij kombi, më 4 korrik, si sot, 236
vjet më parë, kishin vendosur të krijojnë shtetin e bazuar në lirinë dhe të
drejtat e barabarta të secilit komb. Trashëgimia dhe porosia e tyre e çoi
Amerikën në luftë, për të mbrojtur principet e lirisë dhe demokracisë amerikane
edhe në Kosovë, dhe të gjitha ato vende të shtypura nga diktaturat. Për
Amerikën gjëja më e shenjtë, e cila simbolizon edhe këtë ditë, është togfjalëshi
liri-demokraci. Pra, liria e Kosovës ishte emër kuptimplotë për Amerikën dhe
kombin shqiptar. 4 korriku kumbon thellë në zemër tek tri fjalët e para të
Kushtetutës amerikane, "we the people", "ne populli", për
të theksuar rolin e rëndësishëm që shtetasit amerikanë kanë në qeverinë e
Shteteve të Bashkuara: Ato tre fjalë u bëjnë thirrje amerikanëve të mos
harrojnë se përveç pushtetit që ata ushtrojnë ndaj qeverisë, nëpërmjet të
drejtës së tyre të votës, ata duhet të mbajnë edhe përgjegjësinë për lirinë e
vendit të tyre. Besojmë se askush më mirë se ne shqiptarët, nuk e ka kuptuar
këtë, askush më mirë se ne shqiptarët nuk e di faktin se Shtetet e Bashkuara të
Amerikës janë betuar në nderin e tyre dhe që demokracia, liria e popujve, të
mbrohet atje ku ajo dhunohet dhe shtypet. Armiqtë më të mëdhenj të Amerikës,
nuk janë popujt, por janë diktaturat e diktatorët, shtypja e popujve
liridashës, skamja dhe mjerimi i tyre.
Miku më i Madh i Amerikës, është ai komb që do dhe lufton
për paqen, lirinë dhe demokracinë, jemi ne shqiptarët. 4 korriku, Dita e Pavarësisë
amerikane, aq sa i përket kombit amerikan, po aq na përket edhe shqiptarëve,
kombit shqiptar. Kombi shqiptar feston 4 korrikun, ashtu siç feston 28 Nëntorin
e Pavarësisë së shtetit shqiptar, ashtu si feston çlirimin dhe lirinë e
Kosovës, 12 qershorin 1999, e cila i është mirënjohëse për jetë Shteteve të
Bashkuara të Amerikës. Presidenti i parë historik i Kosovës, Dr. Ibrahim
Rugova, ia ka dedikuar sa ishte gjallë, gjithë këtë mrekulli admirimit dhe
respektit që kanë shqiptarët për Amerikën, presidentëve Uilson, Regan,
Klintonit, që i tha ndal genocidit në Kosovë me intervenimin ushtarak sulmet
ajrore të NATO-s, por edhe me të ashtuquajturën "Vija e Kuqe" në prag
të Krishtlindjeve të Bushit të vjetër, por edhe presidentit George W. Bush, i
cili i vizitoi për herë të parë trupat amerikane në Kosovë, fill pas inaugurimit
presidencial, dhe në vizitën e parë të një presidenti amerikan në detyrë kur
vizitoi Tiranën deklaroi "Kosova vetëm e pavarur nga Serbia".
Presidenti i ndjerë i Kosovës Dr. Ibrahim Rugova, patë thënë:
"Ne shqiptarët i duam amerikanët, sepse ata na dhuruan lirinë, që ne
dëshironim - pikërisht për këtë ka një respekt ideal. Me Amerikën ne jemi të vegjël,
por miq të mëdhenj që mund të bëjmë edhe punë të mëdha".
SHBA dhe ne shqiptarët
Sot më 4 korrik 2012, kur Shtetet e Bashkuara po kremtojnë
236-vjetorin e Pavarësisë së tyre, kombi shqiptar dëshiron të tregojë me
sinqeritetin e tij se shqiptarët, u janë mirënjohës miqve të tyre të shumtë
amerikanë, ndër të cilët presidentit Woodrow Wilson, për përpjekjet që kanë
bërë dhe vazhdojnë të bëjnë për kombin tonë dhe për ruajtjen e miqësisë
shqiptaro-amerikane, e cila këtë vit shënon 90-vjetorin e vendosjes së
marrëdhënieve diplomatike. Dhe kjo është në traditën amerikane, me politikën që
ka mbajtur gjithnjë kundrejt Shqipërisë, të filluar prej presidentit të madh,
Woodrow Wilson, kujtimi i të cilit ka mbetur i paharruar në zemrat e mendjet e
shqiptarëve.
Në Konferencën e Paqes, në Paris, në fund të Luftës së Parë
Botërore, Presidenti Woodrow Wilson, flaku poshtë Traktatin e Fshehtë të
Londrës (1915), që sakrifikonte të drejtat legjitime të Shqipërisë dhe u kërkoi
përfaqësuesve të fuqive të mëdha, respektimin e pavarësisë së plotë të
Shqipërisë, duke deklaruar se "Kufijtë e botës nuk ndahen sipas madhësisë,
por sipas kombeve që atyre u përkasin".
Mirëpo, duhet theksuar se megjithëse regjimi komunist i
Enver Hoxhës, për 50 vjet i ndërpreu lidhjet me SHBA, tek zemrat e shqiptarëve
në vite u rrit e u farkëtua miqësia shqiptaro-amerikane. Me këtë rast,
shqiptarët nuk e harrojnë presidentin Bush (plakun), në prag të Krishtlindjeve,
i cili vendosi "vijën e kuqe", vijë që sinjalizoi diktatorin
Millosheviq, që kurrë Amerika s'do të lejonte një Bosnje të dytë, me
shqiptarët. Vizitën në Shqipëri të Sekretarit të Shtetit, James Baker, në vitin
1991.
Vizita që bëri në Shqipëri, në qershor 2007, Presidenti i
43-të, SHBA-së, George W. Bush, padyshim që mbetet një nga vizitat më të rëndësishme,
që ka bërë ndonjëherë një personalitet i lartë i politikës botërore, gjatë gjithë
historisë së këtij vendi të vogël të Ballkanit, me tre besime fetare, që jetojnë
në një bashkëjetesë dhe harmoni shembullore fetare. Edhe presidenti Bill
Clinton u qëndroi besnik fjalëve të paraardhësit të tij, presidentit George H.
Bush, Clintoni u bë njeriu më i dashur dhe më i besuar për shqiptarët kur
premtoi: "Amerika do të jetë me Kosovën"! Amerika ishte me Kosovën në
luftë, tani ajo është me Kosovën në paqe, me Kosovën në liri, me Kosovën në
Pavarësinë e saj. Amerika ishte garant i ngadhënjimit të luftës ndaj diktaturës
së egër të Millosheviqit dhe tani ajo është garant që Kosova të ndërtojë në
paqe shtetin demokratik të Kosovës, pavarësinë e saj shtetin demokratik, sovran
dhe të pavarur.
Comments
Post a Comment