Gjakova, mirënjohje kolosit shkodran të humorit, Gëzim Kruja

Festivali mbarëkombëtar “Komedia Fest” ka ulur siparin e tij në Gjakovë. Në ceremoninë përmbyllëse të këtij festivali, aktorët e shquar të skenës shqiptare që u shquan me rolet e shumta në komedi, Gëzim Kruja, Sulejman Lokaj, Hysen Binaku dhe pas vdekjes, Hajrullah Zherka janë nderuar me mirënjohje për vepër jetësore nga organizatorët e festivalit “Komedia Fest”. Aktori i skenës shqiptare, Gëzim Kruja, i pranishëm në këtë festival, ka thënë se mirënjohjen do ta ruajë sa të jetë jeta. “Ju falënderoj për mirënjohjen, do ta ruaj tërë jetën se Gjakova e Shkodra jemi një”, - ka thënë Kruja, i cili për disa minuta ka mbajtur në gaz me qindra shikues në sallën universale të Pallatit të Kulturës në Gjakovë. Gëzim Kruja, ikona e humorit shqiptar, ka shkruar mbi 15 komedi, 10 recitale, 2 libra me monologë gazmorë. Gjatë karrierës së tij artistike ka interpretuar mbi njëmijë role në skeçe të ndryshme dhe ka 52 vite që ushtron profesionin e humoristit. Në vitin 2004 ka marrë titullin “Krenaria e Qytetit”. Në vitin 2005 ka marr titullin “Naim Frashëri i Artë” dhe në vitin 2010 është vlerësuar me titullin “Mjeshtër i Madh”.

Pjesëmarrja

Përveç vlerësimit që i është bërë “Mjeshtrit të Madh” shkodran, Teatri Kombëtar i Komedisë në Tiranë ka përshëndetur me premierën “Harroje dashurinë” me autor dhe regji të Erion Kames. Komedia, e cila mbylli festivalin, u mirëprit nga publiku dhe u vlerësua për tematikën bashkëkohore dhe interpretimin realist. Kjo shfaqje do të jetë edhe premiera që do të çelë sezonin e ri artistik të institucionit tonë në datën 29 dhe 30 shtator në orën 19:00.

Festivali

Përveç trupës nga Shqipëria, për shtatë ditë para publikut në Gjakovë janë dhënë edhe shfaqjet nga trupat e Teatrit Kombëtar të Kosovës, Teatrit profesionist të Gjakovës, Teatrit Shqiptar të Shkupit, Tetarit të Fierit, të Pejës dhe të Mitrovicës. Gjatë një jave, festivali ka qenë mjaft i ndjekur, ku kanë dominuar të rinjtë. Lekë Rezniqi, organizator i këtij festivali, ka shprehur se Gjakova është një qytet i vlerave, artit dhe kulturës, bazuar në historinë e pasur të rajonit të Gjakovës nga ngjarje të shumta historike e deri tek personalitetet e shquara të kombit. “Qëllimi i këtij festivali është që të mbrohen këto vlera artistike dhe kulturore, po ashtu të ofrojmë përkrahje për zhvillimin e artit edhe më tej. Kësaj radhe, fokusi ynë është që përmes këtij projekti t’i bashkojë trevat me anë të organizimit të aktiviteteve të ndryshme kulturore gjatë javës së festivalit”, - tha Rezniqi për mediat.