Tefta Radi, vjen me “Migjeni, ky uragan”

Albert Vataj

Gazetarja dhe folësja e shumënjohur e Televizionit Shqiptar, Tefta Radi ka risjellë në kinemanë ABC filmin dokumentar kushtuar shkrimtarit Millosh Gjergj Nikolla, bën me dije “Kosovapress”. "Migjeni, ky uragan" është jo vetëm emri me të cilin Radi ka pagëzuar dokumentarin e saj, për jetën dhe veprën e Migjenit, por edhe një status që skaliti poetin në memuarin e kohës.

Sipas “Kosovapress”, dje në kinemanë ABC është shfaqur premiera e filmit dokumentar kushtuar shkrimtarit Millosh Gjergj Nikolla, me titull "Migjeni, ky uragan". Dokumentari mbështetet mbi dëshmi autentike, në rrëfimet e personave që kanë pasur kontakte me shkrimtarin e madh por gjithashtu pasqyron jetën, veprën dhe virtytet njerëzore që ka pasur si shkrimtar dhe mësues. Ideatorja dhe skenaristja e dokumentarit, gazetaria Tefta Radi deklaroi se pas një pune hulumtuese, përmes këtij dokumentari vijnë edhe fakte te reja e te panjohura më parë për shkrimtarin. Sipas saj, të gjitha së bashku zbulojnë shkrimtarin siç e vlerëson ajo gjeni, Millosh Gjergj Nikolla, që jetoi pak, por la pas një vepër të plotë që u parapriu kohërave. Ajo shpjegon se figura e tij vjen në dokumentar si një qenie e madhe sociale, me gjenialitetin e mendjes, të penës, më historitë e dhimbjes e të dashurisë.

“Motivet që më shtyn të bëjë këtë dokumentar për Migjeni janë të shumta. Së pari që e dashuroj Migjenin dhe krijimtarinë e tij. Së dyti kam burim mirënjohjeje, njerëz nga familja, Radi që kanë punuar me Migjenin në Pukë. Gjithashtu, unë kam punuar disa vite në Pukë, kam hulumtuar rreth tij, kam pasur fatin të njihem më nxënësit e tij, që mbeten dëshmitarët e fundit të viteve 1930, më mirë se ata askush nuk mund të dëshmoj. Jam përpjekur të sjell dëshmi autentike, megjithatë nuk mund të them se kam arritur gjithçka, sepse kërkimet për Migjenin mund të vazhdojnë, të tjerë dokumentar mund të bëhen, të tjera të dhëna dhe fakte mund të rrinë”, ka thënë Radi. Në dokumentar nuk mungojnë edhe dëshmitë e trashëgimtarëve të familjes Nikolla, mbesës Angjelina Ceka dhe nipit Gjergj Pero. Mjaft fakte interesante sjellin edhe studiuesit, Mojkom Zeqo, Adriatik Kallulli e te tjerë.

Mbesa e Migjenit, Angjelina Ceka, e cila sjellë dëshmi të reja nga jeta e shkrimtarit, thotë se edhe në ta kaluarën ka pasur disa dokumentar të shkurtër televiziv që i janë kushtuar Migjenit. Mirëpo, sipas saj, dokumentari i Tefta Radit, "Migjeni, ky uragan", është më i plotë dhe i realizuar në mënyrë perfekte. “Mendoj se ky dokumentar është më i plotë,është trajtuar me dashuri,dhe Tefta edhe si një mësuese që ka qenë në Pukë dhe duke njohur psikologjinë dhe traditat e Pukës,ka hyrë në brendësi të viteve dhe jetës së Migjenit,në kohën kur ai ishte mësues në Pukë”, ka thënë Ceka.

Në dokumentar, një vend të rëndësishëm zënë edhe interpretimet e aktorëve shkodranë Enver Hyseni, Merita Smaja e Paskualina Gruda. Përndryshe, shkrimtari, Millosh Gjergj Nikolla, apo ndryshe i njohur si “Migjeni”, ka lindur me 13 tetor në vitin 1911në qytetin e Shkodrës, ndërsa vdiq më 1938, në moshën 27 vjeçare pas një sëmundjet të rëndë në një spital në Torino të Italisë. Migjeni ishte poet dhe prozator shqiptar i shquar i viteve 1930 dhe konsiderohet si një ndër shkrimtarët më të lexuar e më të rëndësishëm të letërsisë shqipe të shekullit të 20-të. Ai shquhet me veprat e tij, përmes se cilave i këndoi dhimbjes, mjerimit, por edhe te ardhmes qe do te ishte, sipas vizionit te tij, ndryshe. Ky dokumentar është një tjetër vlerësim të merituar që si një breror e shndritshme rri mbi kokën e këtij kolosi të madh te letrave shqipe. Për Migjenin, ndoshta si për pakkënd tjetër ka kaq shumë bashkëkohësi, ka kaq shumë admirim dhe and për me e lexu, për me e rishfletu, për me e pa e ripa, hera mbas here dhe për të përplotësua gjithnjë e ma shumë mozaikun e këtij uragani të poezisë shqipe. Ai vazhdon të jetë, jo vetëm në zemrën dhe vullnesën e mirë të gazetarëve, shkrimtarëve, publicistëve, skenaristëve, regjisorëve për ta ripa këtë dimension të pamatë të tekstshkrimit shqip, por ai asht i gjallë në të tashmen, si në kalesën e kohës që mëtoi dhe kryeveprën e tij.