Mbreti Zog, 51 vjet më pas prehet në atdhe

Eshtrat e Ahmet Zogut tashmë prehen në Shqipëri, 51 vjet nga vdekja e tij. Pas pritjes zyrtare të eshtrave të tij në aeroportin “Nënë Tereza” në Rinas, dje janë zhvilluar homazhet në mjediset e Pallatit të Brigadave në Tiranë. Ndërsa më tej është bërë rivarrosja në mauzoleumin e familjes mbretërore. Në ceremoni ndër të tjerë ishin të pranishëm Presidenti i Republikës, Bujar Nishani, kryetarja e Kuvendit, Jozefina Topalli, Kryeministri Sali Berisha, kryetari i bashkisë së Tiranës, Lulzim Basha. Gjendej gjithashtu edhe Presidentja e Kosovës, Atifete Jahjaga. Ceremonia e homazheve ka nisur në orët e para të paradites për t’u mbyllur me darkën që u shtrua në mjediset e Pallatit të Brigadave nga Presidenti i Republikës.

Presidenti Nishani

Duke e vlerësuar si një detyrim moral prehjen e eshtrave të Mbretit Zog në Shqipëri, Presidenti Nishani gjatë fjalës së tij tha se Mbreti Zog ka luajtur rolin e tij të rëndësishëm në forcimin e shtetit shqiptar. “Historinë mund ta harrosh, deformosh, por edhe kjo është afatshkurtër dhe për të keqen e atij që e beson. Mund të duket se me historinë mund të bësh ç’të duash, por nuk është ashtu, se nuk të lë historia ty ta shpërfillësh, pa të ndëshkuar për gabimet dhe pa të shpërblyer për të mirat”, u shpreh z.Nishani. Më tej ai theksoi faktin se, historia jonë ka nxjerrë jo pak njerëz të shquar, luftëtarë, princër, mbretër, madje edhe perandorë. Një numër prej këtyre, - shtoi ai, - qenë të tillë kur Shqipëria nuk ishte ende shtet, dhe shumica e tyre në atdhe të huaj. “I pari dhe i vetmi mbret i Shqipërisë shtet është Ahmet Zogu, eshtrat e të cilit po rivarrosim sot. Për një periudhë kohe, vendi pati një mbret real. Mbret i një Shqipërie që aspironte, por nuk kishte vetëdije politike, rend dhe praktikisht asnjë infrastrukturë, mbreti ynë shtetin e bëri vetë. Ahmet Zogu ka lënë pas një diskutim të gjerë mes palëve, por ai është një prej figurave kryesore të historisë shqiptare. Ai premtoi të sjellë rendin dhe progresin, këtë synoi dhe nisi të bënte, ai nisi ta bënte Shqipërinë shtet me atributet e një shoqërie ku sundonte qytetërimi. I dha shtetit shqiptar Kodin Civil dhe Penal që mungonin, krijoi administratë të efektshme gjyqësor të besueshëm, luftoi fanatizmin, krijoi kushtet për lirinë e shtypit, forcoi monedhën, shtroi premisat për një shtet modern”, vuri në dukje në fjalën e tij Presidenti. Kurse përmendi dhe një fakt: “Rivarrimi i tij sot aty ku shteti-parti i Diktatorit hodhi në erë varrin e nënës së tij, Nanës Mbretneshë, është simbolika e Shqipërisë që nuk urren, por nderon, që nuk harron, por i jep secilit atë që meriton

kryetari i shtetit kërkoi rishikimin e historisë, në mënyrë që të vlerësohen figurat historike pa ngjyrime politike. Për z.Nishani, sot në prag të 100 vjetorit të Pavarësisë, është xhest fisnik, detyrim moral dhe patriotik që eshtrat të prehen në vendin të cilit Zogu i kushtoi vitet më të mira të jetës, në vendin ku pati edhe kundërshtarë, por ku kujtesa e popullit do ta mbante gjallë emrin e tij.

Kryeministri Berisha

Pas kryerjes së homazheve për nder të Mbretit Zog, kryeministri Berisha u shpreh se shqiptarët në të gjitha trojet etnike e kudo që ndodhen, nderojnë veprën dhe kontributin e Mbretit Zog I. “Ahmet Zogu do të nderohet gjithnjë nga shqiptarët, për kontributin e tij të jashtëzakonshëm historik në zhvillimin e konsolidimin e vokacionit perëndimor të kombit shqiptar, të shoqërisë shqiptare. Në periudhën e mbretërisë së tij, ai bëri përpjekjet më të jashtëzakonshme për zhvillimin e infrastrukturës së një vendi që dukej se vinte nga gjysma e errët e hënës. Ai bëri përpjekje të jashtëzakonshme për zhvillimin e arsimit, të kulturës, të bujqësisë, të biznesit dhe konturoi diplomacinë shqiptare, si një diplomaci aktive”, - përmendi z.Berisha. Sipas tij, Mbreti Zog, sikundër shumica e monarkëve të Europës pas pushtimit, u largua nga Shqipëria, por u largua për të vazhduar betejën në të gjitha frontet, në krahun e koalicionit antifashist botëror. “Natyrisht, në historinë tonë kombëtare, - vijoi z.Berisha, - ne shqiptarët nuk kemi figura eterike, nuk kemi pasur, nuk kemi e nuk do të kemi të pagabueshëm, por kjo nuk është specifikë vetëm e jona. Ata që studiojnë historinë e kombeve më të zhvilluara gjejnë aty të njëjtën gjë, njerëz që kanë bërë gabime, njerëz me kontribute të mëdha”. “Në këtë kontekst, - theksoi Berisha, nëse do të bënim një vlerësim në raport me rrethanat, në të cilat mbretëroi, përpjekjet e tij nuk mund të konsiderohen ndryshe veçse mbinjerëzore, për liri, dinjitet dhe zhvillimin e shqiptarëve”.

Pjesëmarrja

Jahjaga: Vlerësim dhe respekt për ndërtuesit e shtetit

Në ceremoninë e kthimit të eshtrave të Mbretit Zog në atdhe me rivarrosjen e tij në Mauzoleumin Mbretëror, ka marrë pjesë edhe Presidentja e Kosovës Atifete Jahjaga. Gjatë fjalës së saj ajo është shprehur se, kthimi i eshtrave të tij në atdhe simbolizon drejtësinë hyjnore dhe paqen politike. “Prehja në tokën tonë e atyre që u përpoqën për shtet ndërtimin është një amanet i mbetur peng që ne duhet ta kryejmë me nder e krenari. Me këtë dëshmojmë urtësinë duke fituar qetësinë shpirtërore si njerëz dhe komb, duke pasur respekt për punën e prijësve tanë. Shqipëria në udhëheqjen e naltmadhërisë nga një vend i varfër e i pazhvilluar, fisnor e i përçarë u bë një vend modern i kohës, me shtrirje të pushtetit dhe administratës në secilin cep, me tolerancë fetare, shembull për vendet e tjera. Me qeverisjen e tij ndërlidhjen datat më të rëndësishme, që nga shpallja e pavarësisë në Vlorë, luftën në mbrojtje të Shkodrës, duke përzënë trupat malazeze, serbe, greke, italiane dhe trupat e tjerë të huaj nga territori i shtetit, në zbatim të vendimeve të kongresit të Lushnjes”, u shpreh Presidentja Jahjaga. Gjithashtu ajo theksoi se, Zogu dhe gjithë populli i pritën me gjithë zemër kosovarët e përzënë nga vendi i tyre, respektoi tolerancën fetare.

Largimi i Mbretit Zog dhe kthimi i eshtrave

Mbreti Zog u largua nga Shqipëria në prill të 1939, ditën e pushtimit të Shqipërisë nga Italia fashiste. Pas përfundimit të luftës së dytë botërore regjimi komunist i ndaloi atij dhe familjes mbretërore rikthimin në atdhe. Mbreti Zog jetoi në mërgim deri sa u nda nga jeta në prill të 1961, në Paris. Pas varrimit në Paris, eshtrat e mbretit Zog u kthyen në Tiranë pas 51 vitesh dhe u pritën në një ceremoni zyrtare shtetërore në aeroportin ndërkombëtar “Nënë Tereza” në praninë e familjes mbretërore dhe ministrit të brendshëm Flamur Noka, ministrit të mbrojtjes Arben Imami, ministrit të Turizmit kulturës rinisë dhe sporteve Aldo Bumçi, kryetarit të Partisë Lëvizja e Legalitetit Ekrem Spahiu, miqve dhe familjarëve të familjes Mbretërore.