Në një betejë të madhe që u bë gjatë ankandit të organizuar
nga shtëpia e ankandeve “Sotheby”, kryevepra moderne e Joan Miro “Peinture”
(Etolie Bleue) është shitur për më shumë se 23 milionë funte (28 milionë euro).
Kjo vlerë ka thyer rekordin e piktorit spanjoll. Çekiçi ka
rënë pas një “lufte” që është zhvilluar midis katër blerësve. Shuma e paguar
është më e madhja për një vepër arti që është arritur brenda këtij viti në
Londër. Helena Newman, udhëheqëse e departamentit të “Sotheby” për Art Modern
dhe Impresionist, përmes një letre elektronike ka konfirmuar lajmin. “Jemi të
entuziazmuar që sonte kemi pasur mundësi të ofrojmë veprën ‘Peinture’ në
ankand. Kryevepra e Miros jo vetëm se vuri rekord të ri për artistin, por po
ashtu arriti vlerën trefish më të madhe sesa vlera që kishte arritur piktori
pesë vjet më parë”, ka shkruar Newman. Vlera mesatare e veprave të shitura
gjatë kësaj mbrëmjeje ishte mbi 2 miliardë funtesh (2,4 miliardë euro). Gjatë
ankandit janë shitur 23 vepra artistike. E identifikuar nga Miro si një nga
punimet që u hapi rrugë sukseseve, “Peinture” është realizuar në vitin 1927 dhe
i takon ciklit “Dream Painting” (Pikturat e ëndrrave). Vepra i është shitur një
blerësi anonim i cili ka bërë ofertën përmes telefonit. Ankandi i mëhershëm i
Miros ka qenë 16 milionë funte (rreth 20 milionë euro), kur u shit vepra e tij
“Painting Poem” e realizuar më 1925. Çmimi i dytë më i lartë i arritur në këtë
ankand ka qenë për veprën “Homme Assis” të Pablo Picassos, që është shitur për
6 milionë funte (7,4 milionë euro). Në mesin e veprave që arritën shuma të
larta në ankand kanë qenë edhe skulptura “Mother and Child With Apple” e Henry
Moore.
Ankandi ka qenë i pari në sezonin e ngarkuar në Londër, dhe
nëse do të kishte arritur pritjet më të larta, do të kishte përfunduar me një
miliard dollarë. Besimi në tregun e artit është rritur në vitin 2012, me gjithë
telashet financiare me të cilat përballen koleksionuesit, që në të shumtën e
rasteve janë nga Rusia, Kina dhe Lindja e Mesme.
Comments
Post a Comment