Nan, akt i lumnuem shejtnimi

Nan, akt i lumnuem shejtnimi

Albert Vataj

 Nan...

Shejtnue kjoft ky emën,

lumnueme kjoft ky bekim.

Nan, ma e para fjalë, e ma e thella ofshamë.

Akti i epërm mëkimi.

Nan...

Sublime e krijimit asht njaja qi ka emnin tand.

N’zemrën tande mylmye gjuku jem,

N'prehnin tand, endun andrrat, ëndjet e mia

Koha, asht gufi i limfës qi n'ty hovet.

Nan...

Ti Evë e kumtit të zanafillës.

Hyjlindësja Mari, e mëshirshme.

Vullnetmirë, fryti i mundit tand.

Nji lot i zdrypun n'qerpik të synit

asht tançka shpirtin ta ysht n'trazim.

Nan...

Dorën shtrin e yjet i shkokrron prej qiellit

e në prehën mi hedh, tue ma kallzu rrugën e dritës.

Nan...

E hishme dhe e hyjshme si tan natat

N'ty shëmbëllehen nadjet e dritave vezëllitëse.

agimet ku pahet e para pamje faqe kësaj bote

e ku rrzohet e mbramja kreni e naltësimit.

Nan...

Thinjat e tuja, janë shtegu i thepisun,

tehu ku dhimbjet prore mpreh.

Fruti i barkut tand,

jam tue u ndi gjithnji e ma shum.

Nan...

Mundesh e hekash ke shterr

Nji grusht ke mbet, nje britmë ne zenitin e kohës

Një amanet

Kanga e pakëndume e hyjnimit

Solemniteti i mrekullimit të shenjtnis tande

Ti nan

Nan...

Mundesh, krejçka bota mëkon,

në gjoksin tand e nis amën e kandën e jetës

Drita e ylberit, shoka qi përmjetin ma mbulon

Zani që synit dritë mi nep.

Nan...

Kang ma t’gzume në ty e marrin tamlin

Pranverat lulojnë në prehnin tand

e hanat tinëzare me bohçe tande i mblon

E unë strukem drojet si dikur

Kokën mbështes në prehnin tand

Si dielli ngazëllimin e harenë, në ty

Nan...

Ti fillimi e fundi

Tançka zafill e soset me ty

Krejçka niste e mbërrin te ti

Gjithqysh n'ty asht fruti dhe fara

përtrimja e gjithçkasë ka bekimin tand

shugurimin e najsaj zemre, kan krej shëlbime.

Nan...

Tharm i gjithsisë në andën e përgjithmonshme

Krijimi nuk mundet me ken pa ty

Pa ty kurgja nuk lëshohet në krahët e jetës

Në prushin gazmues t'përqafimeve.

Nan...

E perëndishme ti Penelopë e pritjeve epike

E hirshme ti Laur e dashnisë së pasosun

E përkorë, Helen e Trojave tragjike

Zan mali, e bardhë si drita.

Nan...

Nan, në krejt shëmbëllimet e grave

e epërmja hirësi, je.

Rrudhat  e tuja, janë, janë brazdat e nji toke të lërume

Tafti jot asht aroma dehëse e qillit

Nan...

Nan, akt i lumnuem shejtnimi

Beku kjoftë në jetë të jetëve vullneti jot

Shpirti jot, u baftë fole e ma t'ndritshmit yll

yll qi m'kallzon rrugën e hyjnimit toksor

Amen!