Inida Gjata (Zhaku): “Trimnika”, një libër ndryshe

Inida Gjata, apo siç njihet ndryshe me emrin e artit Zhaku, javën e parë të këtij viti ka nisur të botojë një seri librash, të cilët në total do të jenë 12.

Një për çdo muaj të ri. Ajo që ka rrotulluar gjithë vëmendjen e medias rreth saj është fakti se ajo ka guxuar të nxjerrë shumë biseda private me artistë e personazhe të tjerë të njohur, të cilët janë identifikuar, siç ka qenë Dr. Flori, Flor Mumajesi, Shkendije Mujaj e shumë të tjerë. Gjithçka ka marrë shtysë nga shou i fundit ku Zhaku ishte e ftuar, pikërisht te Vip Shpija. Gjithçka rreth librit dhe të rejave që  ajo do të shkruajë në këtë, seri Zhaku i tregon në këtë intervistë.

Zhaku, ke “tronditur” botën e shou bizit shqiptar këtë fillim viti me librin tënd Trimnika. Çfarë të shtyu të shkruaje kaq vrullshëm?

Në fakt, libri TRIMNIKA duhet të trondisë edhe shoqërinë shqiptare edhe politikën edhe mediat. Është një roman që vjen te lexuesi shqiptar, enkas për të shfaqur realitetin në të cilin rrojmë prej dhjetëra dekadash. Është një roman që flet për padrejtësitë, maskarallëqet, censurën, manipulimin, korrupsionin dhe shpifjet. Sidomos në botën e personazheve të famshëm, për të cilët duhet të themi se shqiptarët nuk kanë dëshmi të vërteta. Ndaj dhe unë, meqë më shumë jam pjesë e popullit sesa e shoubizit dhe meqenëse kam qenë “viktimë” e vazhdueshme padrejtësish nga njerëzit e pushtetshëm të medias dhe shout, vendosa të vë drejtësinë në vend (jo vetëm për veten time), ndaj dhe u krijua ky botim satirik, i cili do të zhvillohet me seri. Çdo muaj lexuesit do të njihen me detaje të reja mbi përvojat dhe njerëzit e famshëm të Shqipërisë dhe Kosovës. Libri është i shoqëruar edhe nga karikaturat e këtyre personazheve apo rrëfimeve dhe ngjarjeve që rrëfehen.

Si i ke ruajtur gjithë bisedat e viteve të shkuara? Ke pasur ditar?

Padrejtësitë nuk harrohen kurrë. As lëndimet, as fyerjet, as shkeljet e të drejtave. As vjedhjet, as grabitjet, as manipulimet, as censurimet. Nuk është nevoja të mbash ditar në kësi rastesh. Ditar është vetë dëshpërimi dhe trishtimi që duhet të gëlltisësh nëse je pjesë e këtij lloj sistemi. Në këtë roman, unë kam shpjeguar dhe do të shpjegoj në seritë e tjera edhe më qartë arsyet pse më shtynë drejt këtij botimi, i cili është njëherësh drejtësia dhe Hakmarrja ime. Nëpërmjet tij, shpresoj dhe uroj që të gjithë ata që ndihen të nëpërkëmbur e të shkelur nga njerëz apo rrethana të ngjashme me të miat, të frymëzohen e të bëhen më të fortë. Vetëm forca dhe kuraja është ajo që na bën të ecim përpara. Natyrisht unë kam zgjedhur dhe do të vazhdoj të zgjedh gjithmonë format simbolike dhe metaforike për t’u hakmarrë ndaj atyre që më kanë lënduar dhe dëmtuar padrejtësisht. Këtë do ua sugjeroja të gjithëve. Hakmarrja është një ndjenjë të cilën po nuk dite ta shkarkosh, grumbullohet si kancer dhe na vret si Kali i Trojës. Do të doja që edhe lexuesit të reflektonin nëpërmjet këtij libri dhe duhet të them se janë lexues të ndryshëm, nga kategori të ndryshme të cilët identifikohen me personazhin kryesor TRIMNIKEN dhe marrin zemër e bëhen më të drejtpërdrejtë dhe më kurajozë nëse ndihen të shkelur apo të shtypur.

Në libër përfshihen shumë biseda, ke frikë se njerëz mund të lëndohen nga bërja e tyre publike?

Në roman përfshihen shumë biseda dhe ngjarje reale si dhe njerëz realë, të cilët janë parodizuar dhe karikaturuar qëllimisht, enkas për t’u lënduar. Satira në këtë libër është arma ime dhe ka vetëm një qëllim. Të prodhojë e të shkaktojë atë që padrejtësisht kanë shkaktuar përfaqësuesit e llumit të vërtetë të shoqërisë shqiptare. Besomëni, llumi ndodhet aty ku shkëlqen me shumë luksi. Unë me vetëdije të plotë po i lëndoj këta njerëz të pafytyrë e të ndyrë, të cilët nuk meritojnë asnjë gjë tjetër përveç asaj që shkaktojnë tek të tjerët.

Vëllimi i parë thuajse është përpirë në mediat e shkruara dhe online, duke i bërë shumë jehonë, po duke përfshirë edhe emra të njohur të televizionit dhe spektaklit. Ke pasur telefonata kërcënuese apo ndërhyrje të ndryshme?

Ç’është e vërteta, në këtë roman flitet edhe për ngjarje e njerëz të tjerë të rëndësishëm , të cilët ende nuk i ka identifikuar media, pasi libri ka vetëm një javë në treg dhe shpërndarja e tij ende nuk është kompletuar. Por, unë kam shkruar vetëm të vërtetën dhe siç thuhet në libër gjithashtu, këta “llumra” janë aq të skuthët e të pafytyrë e të djallëzuar saqë jo vetëm nuk kanë kurajë dhe “B…th” të më dalin përpara ( meqë jo vetëm nuk kam sajuar asgjë, por edhe nuk ua kam nxjerrë ende të gjitha të palarat), por përpiqen dhe vazhdojnë të manipulojnë njerëz të afërt të mi dhe familjen time duke i kërcënuar në telefon. Mua vetë nuk më ka kontaktuar askush. Unë këtë botim nuk e kam bërë papritur e papandehur, pasi kam disa muaj që i paralajmëroj dhe kam disa kohë që u jap mundësi këtyre palo rripave që të kërkojnë ndjesë apo të bëjnë një përpjekje për t’u treguar njëherë të drejtë në raport me mua. Por, megjithë paralajmërimet e mia, askush nuk pati kurajën të më dalë përpara e të kërkojë të dijë apo të sqarojë diçka. Në roman do të kuptohen shumë qartë rrethanat dhe raportet mes personazheve kryesore. Do të kuptohen karakteristikat dhe cilësitë thelbësore që përbëjnë njerëzit e famshëm e të rëndësishëm shqiptarë, për të cilët duhet të them se jo vetëm nuk e meritojnë pozicionin që kanë, por shumë prej tyre meritojnë burgun dhe gjobat.

A i ke frikë reagimet e atyre që do të gjejnë veten në këtë libër?

As nuk i mendoj më ata. Është tepër vonë. Tashmë lufta ka nisur dhe unë do ta fitoj, pasi mbaj anën e drejtësisë.

Thua që ky libër është një hakmarrje e Nikës… A duhet të frikësohen armiqtë e saj?

S’kam asnjë qëllim të frikësoj askënd. Unë dua të frymëzoj lexuesit, të rinjtë, artistët, njerëzit e ndershëm dhe të drejtë që të mos lejojnë askënd të shkelë mbi të drejtat, punën, kontributin, dinjitetin dhe veprën e krijimtarinë e tyre.

Veç artistëve, në libër a do të ketë të përfshirë edhe politikanë apo njerëz të biznesit, në botimet e ardhshme?

Të lutem, mos i thërrit artistë ata hajdutë e sharlatanë që s’dinë asgjë e s’kanë pikën e formimit apo të idesë. Romani e shpreh shumë qartë sesa shumë është spekuluar me fjalën artistë. Është edhe një farë proteste ndaj sipërfaqësisë dhe mendjelehtësisë së medias që s’di kë quan artist dhe s’di kë quan të çmendur. Në libër rrëfehen shumë ngjarje dhe në disa prej tyre do të ketë edhe ngjarje ku përmenden politikanë dhe njerëz të biznesit.

Po  histori mes homoseksualëve të botës së artit a do të ketë te hakmarrja e Nikës?

Unë jam prej shumë vitesh aktiviste e të drejtave të njeriut, si dhe një mikeshë shumë e mirë e shumë prej homoseksualëve të Shqipërisë. Asnjëherë nuk i kam gjykuar nga preferencat seksuale njerëzit dhe këtë askush nuk duhet ta bëjë. Megjithatë, unë e di çfarë nënkuptoni ju me këtë dhe duhet t’ju them se ata shumë pak persona që kanë të tjera preferenca seksuale dhe që janë pjesë e shoë-bizit, janë njerëzit më të kultivuar, të drejtë dhe mbështetës që unë kam njohur ndonjëherë.

Si ia bën të shkruash çdo libër për një muaj. Vjen natyrshëm, apo kjo është një punë e nisur kohë më parë?

Unë gjithçka që kam bërë dhe bëj në jetën time e kam të bazuar mbi shkrimin. Shkrimi, vizatimi, muzika për mua janë shumë të natyrshme dhe ritmi me të cilin unë i bëj këto është aq i shpejtë saqë edhe vetë habitem ndonjëherë. Por e kam fituar këtë aftësi vetëm nga të praktikuarit pambarim. Unë kam vite që jam profesioniste dhe qysh fëmijë kam ditur se çfarë do të bëhesha dhe çfarë do të bëja në jetë. I kam pasur idetë e qarta dhe falë Zotit, talentin që më buronte krejt natyrshëm. Ky roman i përmuajshëm, në çdo vëllim të tij ka rreth 200 faqe, ku ndërthuren e ardhmja, e kaluara dhe e tashmja si dhe shumë karikatura të bëra nga unë. Çdo muaj do të jetë kështu. Ky botim i konceptua, u krijua dhe u realizua në më pak se një muaj. Është e lehtë nëse e di çfarë duhet bërë dhe si.

Cila është gjëja që të ka lënduar apo revoltuar më shumë lidhur me shoun Vip Shpija, nga u frymëzove më tepër për librin?

Pjesëmarrja ime në atë reality shoë veçse sa i vuri kapakun padrejtësive që më ishin bërë gjatë 13 viteve karrierë. Në lidhje me atë shou më kanë revoltuar dhe lënduar shumë gjëra. Megjithatë, besoj se në roman shprehen ashtu siç duhet dhe më qartë e konkretisht. Uroj shumë që lexuesit të shkojnë e ta gjejnë këtë botim të shtëpisë botuese “Morava” në libraritë kryesore të Tiranës ose mund ta porosisin tek unë apo në shtëpinë botuese. Ka një çmim të përballueshëm nga të gjithë, vetëm 500 lekë, edhe pse është një libër që është vlerësuar nga shumë njerëz të ndryshëm. Është një botim shumë i veçantë, i cili do të sjellë te lexuesit edhe mundësinë e ndërveprimit mes meje dhe atyre. Do t’u sugjeroja libraritë ‘Adrion’ dhe ‘Albania’. Është i përshtatshëm për moshat nga 15 vjeç deri në 100 vjeç.

Si përdorej Shkëndije Mujaj si vegël seksi në shou dhe historitë erotike

Shpërthimja: Shkëndije Mujaj

Nika: Zhaku

Klori: Dr.Flori

Jonxhela: Ronela Hajati

Pjesë nga libri:

Shpërthimja, e cila po ngrohte vezët pranë Llimit u rrotullua me shumë kënaqësi nga Nika: Heej…unë kreejt i kisha heq, po krahët heka sot. Heej a e dini ju se kur unë shkova me ble ni vibrator kundër celulitit, ajo ishte si pllakë e butë që më dredhte. Kur e vuna qe ktu- tregon me dorë mes kofshëve të saj:- i thashë atij shop boj:- Hej tii kjo ma e mirë se vibratory qenka valla…ku ku bree sa e mir!

Nika: Pse përdor vibrator, shpërthime, ë?

Shpërthimja: Pooo. Crazy jom unë…i kam nja 7 a 8

Llimi: Po në krevat si je?

Shpërthimja: Heej unë crazy jom unë…I çmend ata që m’dojn.

Erdhi shoferi i Llimit dhe Nika doli nga hoteli. Te dera e hotelit sapo kishte parkuar një makinë, prej nga ku zbriti Klori. Nika e përshëndeti dhe pa brenda në makinë një vajzë të re, shumë të bukur dhe me një kurorë missi në kokë. Kishte dëgjuar edhe për hyrjen e një Missi, por aty nuk po kuptohej më asgjë, kush do hynte dhe kush do dilte. Megjithatë Nika u prezantua me të menjëherë.

Nika: Uaa sa e bukur qenke ti mi!!

Missi: Eh..po unë…Missi jom bre…e bukur duhet me kan Miss… normal!!

Nika: A je edhe ti pjesëmarrëse këtu?

Missi: Pooo edhe unë me juve futna sonte.

Nika: A e di ti ku është parukierja?

Missi: Poo, hajde se të çoj unë.

Nika njoftoi Llimin dhe shoferin. Ata u çliruan dukshëm nga ajo barrë. Pritën dhe Jonxhelën dhe u nisën të tria te parukierja.

Jonida Hitoveizi