Shkrimtari Paulo Cuelho vjen me “vlerat jashtëkohore”

Shkrimtari i njohur brazilian, Paulo Cuelho, ka botuar romanin e tij më të ri “Manuscript Found in Accra” (Dorëshkrimi i Gjetur në Accra), në të cilin autori hulumton “vlerat jashtëkohore”. Në fakt, romani i ri i Cuelho është një rrëfim për një grek, i cili paraqitet në dorëshkrimin që disa shekuj më vonë e zbulon një anglez. “Ndarja e fiksionit nga realiteti është gjë e vështirë jo vetëm për një shkrimtar, por edhe për çdokënd tjetër. Ne po jetojmë nën një ofensivë aq të madhe të informacioneve, për të cilat besojmë se janë të vërteta, edhe pse qartazi del që nuk janë”, deklaroi Cuelho për agjencinë AFP. Ndryshe, sipas Cuelho, rrëfimi i ri “bazohet në vlera, e vlerat kurrë nuk janë një fiksion. Kjo për shkak se ato i mbijetojnë testit të kohës”. Shkrimtari të mërkurën ka shënuar 25 vjet nga dalja e njërës prej veprave më të njohura të tij, “Ditari i një Magjistari”.