Perplasja e gjeneratave, moshat ku thyhet kultura dhe respekti

A ju duket se gjeneratat e reja janë gjithnjë e më të pakulturuara? Këtë gjë e konfirmon edhe një hulumtim i bërë kohëve të fundit. Sipas tij, ka fare pak gjasa që të rinjtë e sotëm t’ju pyesin për shëndetin, t’ju përshëndesin në rrugë, t’ju lirojnë ulësen, të japin bakshish...

Hulumtimi i portalit YouGov – i realizuar në 1,000 të anketuar – i cili si pjesë të popullatës së re i konsideron personat me moshë mes 18 dhe 34 vjeç, i konfirmoi të dhënat për të cilat ka kohë që flasin njerëzit më në moshë. Në të vërtetë, sipas hulumtimit, ka fare pak gjasa që të rinjtë e sotëm t’i përshëndesin fqinjët e tyre, apo të lirojnë një ulëse për më të vjetrit, shkruan ditorja britanike ‘Daily Mail’. Po ashtu, është shumë pak e mundur që ata t’i ofrojnë një pije një punëtori që punon diçka në shtëpinë e tyre – siç bënin dikur prindërit e tyre, dhe aq më pak që të lënë bakshish diku. Fqinjët injorohen nga rreth 35 përqind e pjesëtarëve të këtij grupi, krahasuar me 15 të atyre me moshë mbi 55-vjeçare. Mundësia që një ulëse brenda nje mjeti të transportit publik t’i lirohet një gruaje shtatzënë është më e vogël se 17 përqind, ndërkohë që mundësia që e njëjta t’i lirohet një të moshuari është edhe më e vogël, vetëm 12 përqind. Përderisa 83 përqind e personave me moshë mbi 55 vjeçare thonë se punëtorëve që vijnë për të kryer ndonjë riparim në shtëpitë e tyre do t’i ofronin një pije, këtë gjë do ta bënin më pak se gjysma e të rinjve të anketuar.

Dhënia e bakshishit është dhe një element tjetër i analizuar, i cili i dallon gjeneratat e reja nga ato më të moshuarat. Së këndejmi, mundësia se do të mund të merrni ndonjë bakshish nga të rinjtë është për 41 përqind më e vogël sesa mundësia që atë ta merrni nga një person më i moshuar. Psikiatri, dr. Clive Sherlock, pohon se këto ndryshime në sjellje paraqesin një dëshmi të qartë se shoqëria po bëhet gjithnjë e më vetjake dhe me më pak respekt ndaj të tjerëve. “Njerëzit tani janë shumë më të preokupuar me vetveten, dhe ata gjithnjë e më pak brengosen për njerëzit e tjerë. Kjo bashkësi [e të rinjve] është e prirë që të mendojë vetëm për forcimin e vetë material. Ky rregull për ta është shumë më i rëndësishëm sesa kujdesi për shëndetin e fqinjit. Pra, respekti njerëzor ndaj vetes ka rënë shumë, e bashkë me të edhe respekti ndaj ndjenjave të njerëzve të tjerë”, thekson Sherlock.

Për këtë dukuri dr. Sherlock, veç tjerash, fajëson edhe teknologjinë e gjithëpranishme, e cila, sipas tij, i inkurajon njerëzit që të përkujdesen vetëm për veten, por edhe që të mos vërejnë shumëçka përreth.