Dren Abazi: Më pëlqejnë femrat me karakter të fortë e që kanë respekt për veten

Yllka Selita

Ai është jo vetëm kompozitor i këngëve të tij, por edhe i shumë prej kolegëve të tjerë, ky është kantautori Dren Abazi, i cili në një bashkëpunim të tijin të fundit me këngëtaren Ledina Çelo, ka korrur një tjetër sukses në karrierën e tij muzikore. Megjithëse ka edhe një orkestër të tijën me të cilën ka nxjerrë edhe këngë të tjera, duket se Dreni suksesin më të madh, e ka në bashkëpunime me këngëtaret femra, kujtojmë këtu edhe këngën me të cilën u bë shumë i njohur edhe këtu në Shqipëri, “Ti dhe unë”, një duet me këngëtaren e njohur Anjeza Shahini. Në këtë intervistë të dhënë, Dreni tregon si lindi bashkëpunimi me Ledinën dhe çfarë ka vlerësuar ai në këtë bashkëpunim. Ndër të tjera, kantautori tregon se pas një pune të madhe që ka bërë me albumin e tij “Afterparty”, Dreni do të bëjë një pauzë, por për t’u rikthyer me këngë dhe klipe të reja.

Ju keni festuar ditëlindjen javën e shkuar. Cila është dhurata më e bukur që morët?

Megjithëse jemi në një moshë, që në të vërtet nuk na bëjnë shumë përshtypje dhuratat, përsëri unë do të veçoja njërën. Dhurata që do ta veçoja, ishte ajo që më bëri nëna ime. Ishin një palë syze dielli që jo vetëm më pëlqyen, por edhe më emocionuan, pasi ishin bërë nga njeriu më i dashur në botë, që është nëna.

Ju kemi parë së fundmi si kompozitor i këngës së Ledina Çelos, si lindi bashkëpunimi mes jush?

E gjithë kjo, nisi nga një telefonatë që më bëri Ledina. Ajo kishte dëgjuar disa këngë të tjera që kisha kompozuar unë më parë dhe në veçanti i kishte pëlqyer kënga "Ti dhe unë", ku jam në duet me këngëtaren e mirënjohur Anjeza Shahinin. Ideja ishte, që Ledina donte të vinte në ekranet shqiptare më ndryshe, pasi kishte disa vite që ajo kishte munguar në një farë mënyre nga muzika. Normalisht, që nga momenti kur m’u bë ftesa, për mua ishte një kënaqësi që të punoja me një këngëtare si Ledina.

Mund të veçoni diçka që ju ka bërë përshtypje nga bashkëpunimi juaj?

Po sigurisht që puna me njerëz të ndryshëm, normalisht që kërkon qasje të ndryshme ndaj tyre dhe punës me ta. Të punoja me një këngëtare profesioniste si Ledina Çelo, ishte shumë e këndshme dhe e lehtë njëkohësisht. Ajo që mua më bëri përshtypje për hir të së vërtetës ishte përgjegjësia, profesionalizmi dhe përkushtimi që kishte ajo në punë. Cilësi, që nuk të ndodh t’i gjesh tek shumë njerëz sot.

Në të vërtetë kënga "Më ndez", ishte një këngë shumë ndryshe nga ato që jemi mësuar të dëgjojmë nga ju dhe nga Ledina...

Pikërisht kjo ishte ideja dhe ne ia arritëm qëllimit, me të cilin nisi edhe bashkëpunimi ynë. Të gjithë ishin mësuar ta shihnin Ledinën me këngë më ritmike, të rrymës dance etj,etj....Kësaj radhe ideja ishte të bënim diçka më ndryshe..Titulli pastaj, mund të interpretohet në disa mënyra.

Po ju çfarë vlerësoni më shumë tek një femër?

Më pëlqen më së shumti dhe është pikërisht kjo që më bie në sy që në pamje të parë, të qenit vetvetja dhe jo një manekin apo një person i shtirur. Më pas, më pëlqen dhe vlerësoj shumë karakterin e fortë tek një femër dhe për të mos iu nënshtruar askujt.

Dhe çfarë nuk honepsni dot tek seksi i kundërt?

Pikërisht të kundërtën e kësaj që thashë më lart. Nuk honeps dot femrat që në radhë të parë s’kanë respekt për veten dhe kjo vjen sigurisht, pasi ju mungon krenaria. Sepse, nëse dot kishin më shumë respekt për veten, do të ishin në radhë të parë krenare për atë çka janë dhe në këtë mënyrë ju rritet edhe vlerësimi për veten. Kjo është shumë e rëndësishme për çdo njeri në fakt, pavarësisht se çfarë seksi është. Duhet të kesh respekt për veten, në mënyrë që të tjerët të kenë respekt për ty.

Ju keni një shtatlartësi për t’u admiruar, jeni marrë ndonjëherë me sport?

Jo vetëm që jam marrë, por edhe sot merrem me sport gati rregullisht. Për një periudhë kohe kam qenë edhe futbollist dhe kam luajtur për klubin e Prishtinës. Por s'mendoj se kjo ka të bëjë me gjatësinë apo ka ndikuar që unë të jem i gjatë. Unë mendoj se është më shumë gjenetike, pasi të gjithë pjesëtarët e familjes sime, janë njerëz kryesisht të gjatë.

A ju është dashur që të sakrifikoni ndonjë gjë për muzikën?

Mund të them se më është dashur të sakrifikoj disa gjëra, jo vetëm një. Por një gjë është më e rëndësishme për mua, nëse i shoh sot sakrificat që kam bërë, nuk jam bërë asnjëherë pishman për to. Besoj, ia ka vlejtur gjithmonë, sepse muzika është pasioni im më i madh. Dhe kur ka pasion dhe dëshirë për të arritur qëllimin që i ve vetes, sakrificat të duken gjëra të vogla para asaj që do të arrish.

Nëse do të ktheni kokën pas, a ka diçka për të cilën jeni penduar që e keni bërë, apo që nuk keni mundur ta bëni?

Çdo njeri normal me kalimin e kohës fillon të mendojë ndryshe, për gjërat që ka bërë dhe për ato që mbase nuk ka bërë në jetë. Kjo ndikon edhe në faktin që ti mund të pendohesh ndonjëherë për gjërat që ke bërë apo për ato që s'ia ke dalë dot. Por e rëndësishme në jetë është që të bësh pikërisht atë, për të cilën ndihesh mirë, edhe pse kjo ndonjëherë, mund të jetë edhe e gabuar ndoshta.

A do ju shohim këtë vit, pjesëmarrës në ndonjë nga festivalet qe organizohen?

Besoj që po. Me siguri që do të jem në ndonjërin prej festivaleve që organizohen, por ende s’kam vendosur se ku saktësisht ...Për mua nuk ka rëndësi shumë emri i festivali që do të jem pjesëmarrës, pasi më e rëndësishme është fakti që kënga të jetë e bukur dhe të pëlqehet nga publiku.

Cilat janë projektet tuaja më të afërta?

Ka pak kohë që kam përfunduar një nga projektet më të rëndësishme për shumë këngëtarë, që është pikërisht bërja e një albumi të ri. Posa kam hedhur në treg albumin e ri "Afterparty" dhe është e natyrshme që pas kësaj pune intensive dhe me përkushtim, të bëj një pushim, sado të vogël....Por, sigurisht që do të ketë këngë dhe videoklipe të reja nga unë. Pastaj siç e thashë edhe më lart, besoj se do të më shihni edhe ne ndonjërin prej festivaleve të radhës...

.