Në Londër zbulohen mbetjet e teatrit të Shakespeare

Arkeologët kanë zbuluar rrënojat e teatrit ku janë inskenuar për herë të parë disa nga shfaqjet me tekst të William Shakespeare. Mbetjet e “Curtain Theatre”, që ishte hapur më 1577, janë gjetur prapa një kafehaneje në Shoreditch, në lindje të Londrës. Autoritetet kanë premtuar se do ta “ringjallin” këtë teatër dhe aty të inskenohen sërish shfaqje.

 Arkeologët e Muzeut Arkeologjik kanë zbuluar pjesë të oborrit të teatrit dhe mureve të sallës, pas gërmimeve që kishin nisur qysh në tetor të vitit të kaluar. “Kjo është diçka fantastike që na jep pasqyrë unike për teatrot e hershme shekspiriane”, ka thënë të martën udhëheqësi i arkeologëve, Chris Thomas. Teatri “Curtian” ishte menaxhuar nga James Burbage dhe ishte shtëpia e “Shakespeare Company”. Për teatrin nuk ka fakte që nga viti 1622. Shfaqjet të cilat mendohet se janë dhënë premierë në këtë teatër përfshijnë veprat “Henry V”, “Romeo and Juliet”. “Ky është njëri nga zbulimet më me ndikim i viteve të fundit për Shakespare”, ka thënë një zëdhënës i “Ploug Yard Developments”, që ka uebfaqen përmes së cilës është zhvilluar hulumtimi. “Megjithëse dihej se teatri ‘Curtain’ mund të kishte qenë në këtë zonë, lokacioni i vërtetë gjithmonë ka qenë mister”, ka shtuar ai.

Drejtori artistik i “Royal Shakespeare Company”, Michael Boyd, ka thënë se muret e gurët e zbuluar japin ndjenjën e prezencës së hapësirës në të cilën është zhvilluar puna e hershme e Shakespeares. Gërmimet e mëtejshme pritet të realizohen brenda këtij viti.