Enada Hoxha: Të qenit koreograf, sfida më e vështirë për mua dhe Gerdin

Izaura Ndoj

Edhe pse fati është treguar shumë bujar me primabalerinën e Teatrit Kombëtar të Operës dhe Baletit, Enada Hoxha, ajo asnjë ditë nuk resht së punuari për të sjellë në çdo shfaqje elementë të rinj si balerinë dhe koreografe. Në një intervistë për “Summer Time”, Enada Hoxha rrëfen mungesën e Prof. Agron Aliajt, dashurinë për baletin, punët e saj më të veçanta së bashku me partnerin e saj në skenë dhe jetë, si dhe projektet që do ta rikthejnë në shtator në skenën e Teatrit të Operës dhe Baletit. “Mua dhe Gerdit na mungon jo vetëm puna me të, por mbi të gjitha prezenca e tij. Pasioni që kishte për punën, për jetën, të bukurën. Më mungon prekja e tij kur krijonte me ne, këshilla në prova dhe përpara shfaqjes dhe shprehja e tij: “Dil në skenë dhe shkëlqe!” – këto janë fjalët që Enada, me lot në sy na tregon për mungesën e punës së Prof. Agron Aliajt. Enda Hoxha është balerina e Parë e Teatrit të Operës dhe Baletit dhe aktualisht është balerina më e mirë e Shqipërisë. Gjatë gjithë karrierës së saj artistike ka marrë vlerësime maksimale nga kritikat mbareuropiane. Ajo ka shkëlqyer për shumë vite në skenën shqiptare, talenti i saj i jashtëzakonshëm, tashmë i ka kaluar muret e vendlindjes së saj, duke u bërë balerina më e famshme edhe jashtë kufijve.

Baleti “Zhizel” dhe “Plaga e dhjetë e Gjergj Elez Alisë” ishin dy punët e fundit që ju realizuat me të ndjerin Prof. Agron Aliaj. Ju mungon zëri dhe puna e tij sot?

Ah, profesor Agroni! Mua dhe Gerdit na mungon jo vetëm puna me të, por mbi të gjitha prezenca e tij. Pasioni që kishte për punën, për jetën, të bukurën. Më mungon prekja e tij kur krijonte me ne, këshilla në prova dhe përpara shfaqjes dhe shprehja e tij: “Dil në skenë dhe shkëlqe!”. Teksa e kujtoj më mbushën sytë me lot. Ndërsa, zëri i tij më kumbon akoma “Puno. Mos shtero së punuari. Ke akoma vite përpara për të kërcyer dhe duhet ta çosh përpara këtë art të bukur siç është kërcimi!”. Ruajmë kujtime të jashtëzakonshme me profesorin. Na mbeten shumë projekte pa realizuar, por setin fotografik që bëmë vetëm pak përpara largimit të tij nga jeta do të mbetet kujtimi më i bukur i jetës dhe karrierës. Ai u bë njësh me ne dhe me aparatin fotografik. Ato orë kemi qenë në një botë krejt tjetër, një botë që na përkiste vetëm ne të treve. Dhe kjo faleminderit fotografit Armand Sallabanda që arriti të bëjë mrekulli me ne.

Përveçse një balerinë profesioniste pranë TOB-it, ju keni marrë pjesë dhe në disa evenimente, siç ishte ai i “Dancing with the stars”. Mbase kjo ju bën më atraktive në balete?

Puna në “DWS” është e veçantë. Të lodh shumë, por të jep shumë kënaqësi. Të rrit dhe të plotëson nga ana profesionale jo vetëm si balerinë, por edhe si koreografe. Të mos harrojmë që televizioni ndihmon shumë në promovimin e punës që bën një artist. Sidomos kur bëhet fjalë për një audiencë të jashtëzakonshme që ka ky show gjigant. Të dy, me Gerdin, ndihemi vërtet të nderuar që jemi pjesë e stafit të producentes Holta Dulaku që në këto 10 vite ka realizuar projekte shumë profesionale dhe unike në llojin e tyre.

Si prima balerinë, ju nuk reshtni së punuari çdo ditë së bashku me Gerdin. Gjatë gjithë këtyre viteve keni ndonjë rol të veçantë që e kujtoni me shumë dashuri ku në të njëjtën kohë e keni realizuar së bashku?

Fakti që në këto 18 vite në skenë si balerinë të parë tregon që çdo rol të jetë përjetuar në mënyrë të veçantë nga ne. I jemi përkushtuar për ta realizuar sa më bukur dhe në mënyrë sa më profesionale. Një rol i veçantë dhe shumë impenjativ për ne është kur na kërkohet nga TKOB të jemi koreografë dhe balerinë. Të qenit koreograf është roli më i vështirë i joni. Ajo që kërkojmë është të jemi origjinal dhe të suksesshëm në atë që krijojmë dhe kjo nuk është e lehtë. Do shumë punë dhe lodhje. Është një sipërmarrje që na pëlqen.

Duke qenë se partneri juaj është balerin, ju bën të jeni më të kuptueshëm me njëri-tjetrin në çdo moment?

Duke qenë se jemi rritur dhe njohur në teatër, sigurisht kjo ka bërë që të kuptohemi mjaft mirë së bashku. Kjo vihet re shumë mirë në skenë, përveç harmonisë së lëvizjeve, çfarëdolloj gjëje që mund të ndodhë (se skena ka dhe të papriturat e saj) kujdesemi që të mos përcillet tek publiku. Kjo tregon që me një shikim kemi përthithur çdo gjë tek njeri-tjetri. Ndërkohë, bashkëpunimi ka edhe debate. Kjo vlen edhe për ne.

Meqenëse jemi në sezonin veror, Roan ju ndjen më afër, pasi jeni më pak e zënë me baletin apo ndodh e kundërta?

Vërtet që puna jonë është impenjative, gjithmonë jam munduar që të jem prezent për Roan. E kam zgjidhur në forma të ndryshme. Përveç punës, vetes i kam privuar gjithçka për të qenë në shtëpi. Përndryshe e kam marrë me vete në prova, në shfaqje ose kudo që kam qenë e ftuar. Ndërsa, tani që jemi me pushime, ai çdo çast është me mua. Nuk e kuptoj asnjë moment pa të dhe ai po ashtu.

Po Gerdi si baba, është i përkushtuar ndaj djalit po aq sa ju?

Padyshim që ka qenë dhe është prezent për familjen dhe Roan. Del shëtitje, e çon tek lodrat, luan me atë futboll, përveç daljeve të përbashkëta si familje.

Cilët janë projektet që do t’ju rikthejnë në shtator?

Projekte kemi shumë. Edhe oferta të ndryshme nga të tjerë produksione. Po planifikojmë një shfaqje të re që do të jetë homazh për maestron Agron Aliaj.

Ku do t’i kaloni pushimet verore?

Edhe këtë vit besoj do t’ia kalojmë shumë mirë me familjen dhe shoqërinë. Pushimet tona fatmirësisht janë të gjata dhe të mbushura me udhëtime.