Felix Baumgartner: Minutat e rralla në hapësirë

Red Bull Stratos/Misioni nga kufijtë e hapësirës përmbushet me sukses

Roswell, NEW MEXICO - Sportisti austriak Felix Baumgartner tashmë është futur në librin e historisë, duke realizuar hedhjen nga stratosfera, nga 39,044 metra lartësi nga toka. Baumgartner arriti një shpejtësi rreth 1,342.8 km/h*, e cila pasi të certifikohet nga autoritetet përkatëse do ta bëjë atë personin e parë që tejkalon shpejtësinë e zërit në rënie të lirë, duke nxjerrë në këtë mënyrë të dhëna mjaft të vlefshme për eksplorimin e hapësirës.

"Engjëlli jonë mbrojtës do të kujdeset për ty", këto ishin fjalët që u dëgjuan nga Qendra e Kontrollit dhe Felix Baumgartner hapi derën e kapsulës dhe u hodh.

Baumgartner zbriti në tokë me parashutën e tij rreth orës 20:20, 14 Tetor 2012, në shkretëtirën e New Mexico-s, pas 9:03 minutash nga dalja e tij nga kapsula, e cila po mbahej konstante në një lartësi rreth 39,044 metra. Përgjatë 4:20 minuta rënie të lirë, përpara se të hapte parashutën, ai pësoi rrotullime të shumta në hapësirë, por shumë shpejt Felix arriti të fitonte kontrollin e trupit të tij, moment ky i cili u shoqërua edhe me duartrokitje të shumta në Qendrën e Kontrollit të këtij misioni.

"Dita e sotme ka qenë plot ulje-ngritje, ashtu siç ka qenë dhe i gjithë misioni" tha Baumgartner i çliruar. "Patëm një ngjitje të mrekullueshme, më pas një problem temperature me pjesën e përparme të kaskës që unë mbaja në kokë. Dalja nga kapsula ishte perfekte, por më pas trupi im pësoi disa rrotullime me një shpejtësi marramendëse, moment ky jashtëzakonisht i vështirë. Për disa çaste mendova se mund të humbja kontrollin. Isha gjatë gjithë kohës i përqendruar për të rikthyer kontrollin në trupin tim. Ishte më e vështirë nga sa e kisha menduar."

Në konferencën për shtyp pas përmbushjes së misionit Baumgartner tha: "Teksa qëndronnë majë dhe shef gjithë botën, e ndjen veten shumë të pafuqishëm,nuk mendon për thyerje rekordesh".Ai pranon se ajo çfarë i vinte në mendje në ato momente ishte që të zbriste i gjallë në tokë dhe shton: "Ndonjëherë të duhet të ngjitesh shumë lart, për të kuptuar sesa i vogël je".

Gjatë ngjitjes Baumgartner pati një problem në lidhje me temperaturën në pjesën e përparme të kaskës së tij në kokë, duke shkaktuar avull në të, por fatmirësisht kjo avari nuk arriti të kthehej në një moment fatal për misionin Red Bull Stratos. "Kjo është shumë serioze, Joe," i tha ai Kitttinger, konsulentit të tij dhe personit që mbante rekordin botëror përpara hedhjes së Baumgartner, me të cilin komunikonte pa ndërpreje në radio. “Unë nuk ndjej nxehtësi" – kanë qenë fjalët qetësuese të Joe Kittinger.

Miliona njerëz nëpër botë kanë pasur mundësinë për të ndjekur live hedhjen e Felix Baumgartner nëpërmjet kanaleve televizive si dhe në internet, ku është thyer një tjetër rekord në Youtube, me një shifër prej 8 milionë shikues.

Baumgartner dhe ekipi kanë shpenzuar pesë vjet për realizimin e këtij projekti gjigant, i cili do të ketë një kontribut të jashtëzakonshëm për shkencën dhe për mënyrën sesi trupi reagon në kushte ekstreme atmosferike në kufijtë e hapësirës.