Orhan Pamuk vlerësohet me Legjionin e Nderit

Shkrimtari turk, Orhan Pamuk, që është fitues i Çmimit Nobel për Letërsi në vitin 2006, është dekoruar me Legjionin e Nderit, që është mirënjohja më e lartë franceze. “Përkundër të gjitha mirënjohjeve zyrtare, ai mbetet një shkrimtar i avangardës dhe një rinovues i përhershëm”, theksoi ministrja franceze e Kulturës, Aurelie Filippetti, gjatë pritjes së shkrimtarit veprat e të cilit janë shitur në më shumë se 11 milionë ekzemplarë. “Liria e stilit tuaj përputhet në mënyrë të përkryer me liritë e njeriut... Ju, që kurrë nuk kishit mëdyshje, qoftë edhe atëherë kur rrezikonit të mbeteshit i vetmuar, për t’u ngritur kundër harresës dhe heshtjes historike”, shtoi ajo. Pamuk (60) është një ndër intelektualët e pakët turq që në vitin 2005 pranuan ekzistimin e gjenocidit turk ndaj armenëve. Është përndjekur disa herë nga gjykatat e Turqisë, e pas shpërnguljes në SHBA, në vitin 2007 - ku jeton edhe sot - ekstremistët turq e kërcënuan me vdekje. Veprat e tij janë ndër më të shiturat në botë, dhe janë përkthyer në mbi 60 gjuhë botërore. Në vitin 2006 u bë shkrimtari i parë turk që fitoi Çmimin Nobel për Letërsi. Shumë romane të tij tashmë cilësohen vepra klasike, si “Shtëpia e Qetë”, “Quhem e Kuqe”, “Libri i Zi”, “Ngjyrat e Tjera” dhe “Bora” - për të cilin në vitin 2005 fitoi çmimin Medici në kategorinë e letërsisë së huaj – “Muzeu i Çiltërsisë”. etj.