Saimir Pirgu: Shqipërisë i duhemi të gjithë

Arena festive e 100-vjetorit të Pavarësisë, ka pushtuar mbarë popullin shqiptar. Por prania e artistëve, që kanë nderuar shqiptarët anë e mban botës, nuk kishte si të mungonte në këto ditë të shënuara për ne. “Rrugëtimi i Kombit” është koncerti, që ka mbledhur emrat më të suksesshëm shqiptarë nëpër botë, për t’i ngjitur në arenën e “Pallatit të Kongreseve”. Nuk kishte si të ndodhte ndryshe dhe të mungonte tenori me famë botërore Saimir Pirgu. Në një intervistë Saimir Pirgu, pak orë para koncertit rrëfeu ardhjen e tij në këtë ditë të veçantë për të gjithë shqiptarët, lidhjen e tij me Shqipërinë si dhe dy ariet e kënduara nga i madhi Gaqo Çako. Më tej gjatë intervistës, Pirgu tregon dhe projektet që do ta ndjekin në vazhdim. “Pa diskutim që agjenda e koncerteve është mbyllur me kohë, për të mos thënë deri më 2016-ën. Viti 2013 është viti “Verdian” dhe do të jem në arenën e Veronës, por do ta nis me operën e Zyrihut, më pas do të jem në “Metropolitan Opera” në Nju Jork, ku do të jem sërish në skenë me “Traviatën”. Interesante do të jetë që tenori i madh botëror Placido Domingo, do të interpretojë “babain” tim”, - shprehet Pirgu. E më pas projektet e tij vazhdojnë me të tjera kryevepra si “Rigoleto” në “Royal Opera House Covent Garden” në Londër dhe Zvicër, “L’Elisire d’Amoure” në Vjenë, “Makbeth” në Firence, “Bohem” në Washington, “Don Giovanni” në Moskë, etj.

Riktheheni në skenën e Pallatit të Kongreseve në kuadër të Koncertit Jubilar “Rrugëtimi i Kombit”. Si ndjeheni duke ditur që kryesoni artistët më të mirë shqiptarë të ardhur në Tiranë për 100-vjetorin e Pavarësisë?

Është një emocion tepër i madh për mua, që jam pjesëmarrës në këtë koncert. Gjatë një bisede që bëra një natë para këtij koncerti dhe me nënën time, po i tregoja asaj që jam shumë i kënaqur, sepse jam krenar që ky 100-vjetor i shpalljes së Pavarësisë më përfshin edhe mua, sepse është një vit shumë i rëndësishëm 2012. Nuk kishte si të ndodhte ndryshe, ku me të gjithë impenjimet e mia të mos isha në Shqipëri. Kam lënë provat që po zhvilloja dhe kam marrë një kolegun tim, i cili më ka zëvendësuar atje, pasi sot dhe nesër do jem në atdheun tim, vendlindjen time që më ka rritur dhe ndjekur nga pas.

Mund ta cilësojmë ardhjen tuaj në Tiranë si një dhuratë për 100-vjetor?

Ardhja ime në Tiranë është një impenjim, Shqipërisë i duhet Saimiri, Inva, Ermonela, i duhen të gjithë shqiptarët, dhe në qoftë se ne sot nuk do të ishim këtu, do të ishte sikur t’i mungonte një brinjë Shqipërisë. Ne duhet të shpresojmë që ka ardhur koha jonë, ka ardhur koha e shqiptarëve dhe të bëhemi pjesë e asaj Evrope, që ne i kemi munguar prej shumë vitesh.

Dy këngë të të madhit Gaqo Çako do të vijën përmes zërit tuaj në koncertin “Rrugëtimi i kombit”...dy këngë që ju kanë shoqëruar gjatë fëmijërisë tuaj?

Është një përgjegjësi kaq e madhe, pasi janë kënduar kaq bukur nga i madhi Gaqo Çako. Ardhja jonë e furishme brenda kësaj dite, besoj se do të më emocionojnë kur t’i prezantoj për publikun shqiptar. Inva Mula këtë herë ishte dhe drejtore artistike në këtë koncert dhe ajo kishte menduar që këto arie do të ishin gjëja më e bukur që unë do të këndoja, “Fjalët e qiririt” dhe “Dua më shumë Shqipërinë”. Një prej tyre është dhe një duet me sopranon Inva Mula. Unë jam rritur me këto këngë dhe është një përgjegjësi shumë e madhe, ato janë kënduar aq bukur nga i madhi Gaqo Çako, dhe kam jo pak emocione.

Para dy vitesh sollët një surprizë të bukur për të gjithë artdashësit, një koncert recital. Keni ndonjë projekt që do t’iu rikthejë sërish në skenën shqiptare pas Jubileut?

Ardhja ime në 2010 me një koncert recital, ka qenë një ndër momentet e bukura të karrierës dhe sukseseve të mija. Pavarësisht angazhimeve të shumta që kam, nuk e kam braktisur kurrë Shqipërinë që më rriti. Shpresoj që vitin që vjen të bëj gati surprizën për publikun shqiptar, një projekt artistik në Shqipëri.

Cilat janë projektet që do t’iu ndjekin në vazhdim pas largimit nga Tirana?

Është një emocion i madh të jem prezent përkrah artistëve dhe shqiptarëve në këtë ditë të shënuar. Pas Tiranës, do t’i kthehem projekteve që kam lënë në mes siç është ai operas, “Traviata” në Napoli të Italisë. Pas shumë përpjekjesh është vendosur që ky produksion të transmetohet “live” në televizione si Rai dhe Mediaset. Shpresoj të jetë një tjetër surprizë, që do më ndjekë gjatë këtyre ditëve.

Jemi në prag të festave të fundvitit, por besoj se agjenda juaj prej kohësh është bërë gati për vitin 2013-të?

Pa diskutim që agjenda e koncerteve është mbyllur me kohë, për të mos thënë deri më 2016-ën. Viti 2013 është viti “Verdian” dhe do të jem në arenën e Veronës, por do ta nis me operën e Zyrihut, më pas do të jem në “Metropolitan Opera” në Nju Jork, ku do të jem sërish në skenë me “Traviatën”. Interesante do të jetë, që tenori i madh botëror Placido Domingo, do të interpretojë “babain” tim. Më vonë do të nis punën për kryeveprat si “Rigoleto” në “Royal Opera House Covent Garden” në Londër dhe Zvicër, “L’Elisire d’Amoure” në Vjenë, “Makbeth” në Firence, “Bohem” në Washington, “Don Giovanni” në Moskë, etj.

Veprimtaria

Zanafilla dhe karriera e tij e suksesshme

Saimir Pirgu, 28 vjeçari shqiptar me origjinë nga Elbasani është sot një nga tenorët më të njohur e më të kërkuar të skenës operistike ndërkombëtare. Me një ritëm prej enfant prodige, ai i përfundon në vitin 2003, në Konservatorin e Bolzanos, në Itali, studimet e nisura në moshën 6 vjeçare në qytetin e lindjes. Në Itali e ka zanafillën edhe karriera e tij profesionale. Po këtu, në 2004-ën, Saimir Pirgu debuton si profesionist, në moshën rekord 22 vjeçare, në rolin e Ferrandos, në operan moxartiane “Così fan tutte” të drejtuar nga maestro i madh italian Claudio Abbado. Që atëherë karriera e tij, e vlerësuar me çmime prestigjioze ndërkombëtare, ka shënuar vetëm rritje të shpejtë dhe suksese të njëpasnjëshme. I vlerësuar nga Pavarotti si një nga talentet më premtuese të lirikës botërore, Pirgu debuton në Vjenë, në Berlin, në Salzburg, në Romë, në Londër, në Paris, në New York e në Los Angeles, përkrah profesionistëve më të mëdhenj të skenës ndërkombëtare.

Izaura Ndoj