Suela Piciri: Një violinë për 100-vjetorin e Pavarësisë

Tingujt që ka dhuruar përmes violinës së saj, gjithmonë janë vlerësuar dhe mirëpritur nga publiku. Për të nderuar këtë ditë solemne për Shqipërinë, violinistja e njohur Suela Piciri, ka qenë pjesë e Koncertit Jubilar “Rrugëtimi i Kombit”. Në një intervistë violinistja Suela Piciri, rrëfen emocionet dhe rikthimin e saj në skenën shqiptare në kuadër të 100-vjetorit të Pavarësisë. Suela Piciri ka qenë violiniste soliste dhe koncertmaestër në Orkestrën Simfonike të TKOB, prej shumë vitesh. Në vitin 1999 diplomohet në Akademinë e Arteve. Ka marrë pjesë në të gjitha prezantimet e TKOB jashtë vendit në cilësinë e koncertmaestrit si: Francë, Itali, Greqi, Maqedoni. Ka qenë një ndër violinistet më të aktivizuarat në formacionet e muzikës së dhomës, në vend dhe nëpër botë, me disa nga ansamblet më të njohura. Si soliste ka interpretuar në recitalet e saj të vlerësuara, të realizuara në vend si, stinët koncertore “Allegreto Albania” e shoqëruar nga pianisti Roberto Arossio, në “Klasik” si dhe në aktivitetet e “Nei suoni dei luoghi”, etj. Sot, Suela Piciri është bërë pjesë e Teatrit të Venecias, “La Scala-s”, Veronës dhe shumë arenave të tjera evropiane.

Koncerti “Rrugëtimi i Kombit” ju ka rikthyer edhe ju, mes artistëve shqiptarë. Si ndjeheni në këtë 100-vjetor të Pavarësisë?

Në radhë të parë jam shumë e lumtur, që jam prezente në këtë koncert madhështor. Edhe sikur të mos ishte koncerti, do të ishte ëndërr që të isha në vendin tim në këtë event Jubilar. Prezenca ime është një dhuratë për vendin tim! Është një violinë më shumë për 100-vjetorin e Pavarësisë.

Cilat janë pjesët, që ju do të interpretoni në këtë event?

Jemi tre koncermaestro që do të luajmë me orkestrën, tre arie të ndryshme. E ndjej veten të përkëdhelur që jam pjesë e koncertit “Rrugëtimi i Kombit”, pasi prej disa vitesh jam larguar edhe unë nga skena shqiptare. Ashtu si unë janë të shumtë kolegët, që e meritojnë të jenë prezent në këtë mbrëmje. Në pamundësi për të ardhur të gjithë ato instrumentistë që kanë dhënë kontributin si brenda dhe jashtë vendit, jam shumë e lumtur që jam pjesëmarrëse këtu.

Së fundm,i arritët një sukses në teatrin “La Scala”. Ka qenë e vështirë arritja për të prekur këtë skenë?

Prej dy vitesh unë jetoj në Itali, për arsye se jam martuar atje. Për këtë arsye vendosa të jetoj dhe të eci përpara në këtë rrugë të mrekullueshme në Itali. Të them të vërtetën jam nga artistët e fundit që ka ikur jashtë Shqipërisë, por pas arritjeve në Shqipëri, më është dashur ta nis çdo gjë nga fillimi dhe me shumë punë. Pas një përkushtimi të madh, jam bërë fituese e audicioneve në “La Scala”, në arenën e Veronës dhe për momentin jam në orkestrën “Grand Teatro” në Venecia.

Pjesëmarrja juaj në këto audicione konsiderohet një sfidë?

Ka ndodhur çdo gjë rastësisht! Unë nuk e kam menduar kurrë largimin nga Shqipëria, por erdhi jeta e atillë, që unë të ndryshoja çdo gjë nga fillimi. Nuk kam qenë fare e përgatitur për suksese të mëdha dhe kjo ka qenë një arsye e fortë që unë të “luftoja” me aftësitë e mija për të prekur këto arritje dhe vlerësime.

Cili është urimi juaj për 100-vjetorin e Pavarësisë?

Të gjitha fjalët, që mund të shpreh, do të jenë shumë të vogla në krahasim me ndjenjën që kam.

Cilat janë projektet, që do t’iu ndjekin në vazhdim?

Për momentin jam në Venecia, dhe prej disa kohësh jam bërë pjesë e orkestrës. Në fakt për Vit të Ri, do të jem bashkë me tenorin Saimir Pirgu, i cili vjen për të performuar për koncertin, që jepet direkt nga “Rai”. Më pas çdo gjë varet nga programi, që harton teatri. 

Izaura Ndoj