Mateus Frroku: Pritja në “Kënga Magjike”, si një ëndërr

“Kam bërë tifo për Xhesikën në ‘X Factor’ dhe vijoj të bëj tifo për të”

Ilda Lumani

Është dashur një melodi e duhur, një tekst romantik një bashkëpunim me një zë të veçantë dhe suksesi flet vetë. Pasi prej një jave ky kombinim e ka bërë të jetë si në ëndërr këngëtarin e ri Mateus Frroku, i cili është rikthyer në muzikë bujshëm me këngën e tij, duet me këngëtaren Xhesika Polo, “Më shumë të dua”. Pjesëmarrja në “Kënga Magjike” nuk është e parë për të dhe ai e di mirë ndjesinë që i fal ky festival. Aq më tepër reagimet që ka marrë për këngën e bëj të ndihet edhe më me fat edhe më i lumtur. Nën këtë dozë ndjesish të bukura, ai shfaqet edhe në këtë intervistë mjaft të këndshme.

Mateus, si e vlerëson pjesëmarrjen në “Kënga Magjike”?

Së pari, faleminderit shumë për këtë intervistë që po bëjmë bashkë dhe një përshëndetje shumë të madhe për të gjithë lexuesit. Më pëlqen fakti që jam pjesëmarrës në “Kënga Magjike”, sepse është një event ku pjesëmarrës janë shumë këngëtarë të njohur dhe me këngë të bukura dhe kjo padyshim që e bën garën e bukur dhe interesante. Fakti që në krye të tij është një emër si Ardit Gjebrea e bën akoma më interesant këtë fakt. Arditi ka një përkushtim shumë të madh për këtë festival dhe unë ndihem shumë mirë për këtë fakt.

Si lindi ideja e bashkëpunimit me Xhesikën?

Ka lindur krejt rastësisht. Unë Xhesikën e kam ndjekur në performancat e saj në “X Factor” dhe e kam pëlqyer shumë, por nuk mendoja se do të kishim një bashkëpunim kaq shpejt. Gjithçka erdhi shumë shpejt. Unë dëgjova një material muzikor në studion e mikut tim Elgit Doda dhe menjëherë mendova Xhesika Polo… dhe më pas të dy bashkë vendosëm ta këndojmë këtë këngë.

Duket se e kishit lënë pak pas dore muzikën, përse nuk keni qenë shumë aktiv?

Është e vërtetë… kjo nuk ka ardhur si pasojë e një strategjie të menduar, por shpesh kam ndier mungesën e një materiali të mirë. Kjo ka bërë që unë të mos jem shumë i pranishëm në eventet në televizion. Kënga “Më shumë të dua” ishte ajo që mua më “çarmatosi” dhe u dorëzova. (qesh).

Beson se dalja nga talent-show si “Ethet...” në këtë rast është mënyra më e mirë për të hyrë në muzikë?

Sigurisht që po. “Ethet...” kanë qenë një shkollë për mua, si në jetën artistike, ashtu dhe në atë personale. Gjithçka për mua filloi aty. Shpesh i kam thënë vetes se jam njeri me fat për shkak të pjesëmarrjes time në “ETHET”, pasi kjo më ka ndihmuar shumë të jem pranë muzikës dhe publikut.

Jeni i kënaqur me rrugëtimin tuaj deri më tani në muzikë?

Ende jo… por shpresoj të kem nisur një rrugë të mbarë tashmë. Unë jap maksimumin e vetes dhe dëshiroj që këtë të bëj gjithmonë. Dëshiroj të jem serioz në atë që bëj dhe njerëzit të dëgjojnë muzikën time dhe më vjen shumë mirë që kënga “Më shumë të dua” pëlqehet shumë nga publiku. Kjo më gëzon pamasë.

Çfarë aspiron nga ky “Festival”?

Të them të drejtën unë në “Kënga Magjike” marr kënaqësi pafund. Dua që dhe këtë herë të jetë po kështu. Dua të ndihem i plotësuar dhe i duartrokitur nga publiku. Dua që kënga jonë këtë vit të depërtojë në publik të jetë e pëlqyer.

Xhesin e keni ndjekur ne X Factor, çfarë mendimi kishit për të para se të bashkëpunonit?

Unë isha tifoz për Xhesikën. E them vërtet këtë. Më pëlqen siguria dhe figura që ajo krijon në skenë. Është e vogël në moshë, por unë e harroj këtë dhe Xhesika mua më përcjell një artiste që ka një eksperiencë të gjatë në skenë. E vlerësoj shumë vokalin e saj (është një ngjyrë shumë e veçantë dhe shumë bukur). Për çudi unë vazhdoj të jem përsëri tifoz i Xhesikës.

Çfarë reagimesh keni marrë deri më tani për këngën?

Pafund, si asnjëherë tjetër kam marrë mesazhe pafund në telefonin tim. Reagimet në ambiente publike kishte kohë që më kishin munguar. Kjo më bën të ndihem vërtet mirë. Këtë javë jam ndjerë shumë i plotësuar dhe aspak i lodhur. Kjo është magjia, për të cilën në mundohemi pa fund, me orët e stërzgjatura në studio me lodhjen pa fund. Kur kënga ka sukses është ndjesi që nuk dëshiron të zgjohesh kurrë nga kjo ëndërr.