Ardita Statovci, “Femra e bukur është margaritar. Femra e bukur dhe e mençur është thesar”

 “Femra e bukur është margaritar. Femra e bukur dhe e mençur është thesar”, u tha në koncertin solistik, fjalë të cilat iu dedikuan pianistes Ardiana Statovci, sa për të treguar madhështinë e performancës së saj të hënën mbrëma. Pianistja kosovare, e cila jeton prej vitesh në Salzburg, për herë të fundit kishte përformuar në Kosovë në nëntor të vitit të kaluar duke iu përgjigjur një ftese të “Fondacioni për nënat dhe foshnjat e shëndosha” për një koncert bamirësie. Një vit më vonë ajo u kthye sërish në Prishtinë. Ardita Statovci, pianistja nga Kosova, e cila pasi fitoi një mori çmimesh e bursash ndërkombëtare, dhe zuri një vend të rëndësishëm në muzikën serioze botërore, të hënën mbrëma në sallën ku ajo si fëmijë kishte luajtur tingujt e parë të karrierës së saj tashmë shumë të suksesshme, iu rikthye publikut kosovar i cili e ka dashur dhe e ka përkrahur që nga fillimi, me një përformancë njëorëshe, që përmbante vepra të përformuara për herë të parë para publikut kosovar.

Programi filloi me “ Varri i Couperin” nga Maurice Ravel për të vazhduar më pas veprën e kompizitorit Akil Koci "Për Arditën". Pastaj radhën e kishte një vepër që u prit mjaft mirë nga publiku, vepër po ashtu shqiptare "Kambanat arbëreshe" të Rafet Rudit, të cilën ajo e kishte interpretuar edhe disa herë tjera. “Alleluia” e Franz Liszt dhe kryevepra e literaturës botërore “Variacione dhe fugë me temë nga Handel” të kompozitorit Johannes Brahms, vepër kjo që zgjat rreth gjysmë ore. Kompozitori kosovar Rafet Rudi, vepra e të cilit u interpretua në koncert, për përformancën e Ardita Statovcit, u shpreh: “Përformanca ishte mjaft e suksesshme dhe është për t’u lavdëruar sidomos kultura e saj në intepretim, gjithashtu për çdo lavdatë është edhe sajimi i programit nga ana e saj, program që flet për kulturën e saj” . “Do të lavdëroja atë edhe për afirmimin që ajo u bën gjithmonë veprave të kompozitorëve tjerë, gjë që nuk ndodh tek interpretët e tjerë dhe sa i përket veprës ‘Kambanat arbëreshe’, ishte hera e parë për mua që e dëgjoj Arditën duke performuar atë dhe mund të them që ishte interpretim i jashtëzakonshëm” , shtoi ai për Zëri, duke komenutar edhe interpretimin e veprës së tij nga ana e pianistes së shquar. Performanca e Statovcit u mundësua nga Ambasada e Austrisë, vendit ku jeton dhe zhvillon aktivitetin e saj Statovci, e cila i kishte bërë një ftesë asaj për koncertin që erdhi si një urë lidhëse mes dy vendeve, Kosovës dhe Austrisë.

Qëndrim Muçolli “Zeri”