Lamtumirë Fran Babaj, artisti dhe sindikalisti i përkushtuar..!

Nga Dylejman Karaj*

Dje u nda nga jeta parakohe, në moshën 50-vjeçare si rrjedhojë e një ataku kardiak të papritur, miku dhe shoku ynë, babai i dashur dhe i dhembshur, bashkëshorti dhe familjari i mirë Fran Babaj, Presidenti i Sindikatës së Pavarur të Artistëve, Gazetarëve dhe Sportistëve të Shqipërisë. Pikëllimi dhe dhimbja e thellë i pushtoi të gjithë, teksa ishin mbledhur për t'i dhënë lamtumirën e fundit, bashkëpunëtorit tonë të ngushtë dhe të përkushtuar, artistit dhe sindikalistit idealist.

Humbja është e rëndë për cilindo. Por, natyrisht më shumë se të gjithë e ndien familja e tij, bashkëshortja, dy vajzat e dashura dhe djali ende i vogël dhe i njomë. Dhimbje dhe trishtim ndiejnë të afërmit dhe miqtë e tij të shumtë nga e gjithë Shqipëria, që kishin ardhur për t'i dhënë lamtumirën dhe për t'i bërë nderet dhe respektet e fundit. Dhimbje ndiejnë edhe demokratët, sepse Fran Babaj ishte deri në ditën e fundit, aktivisti dhe anëtari më i përkushtuar i Partisë Demokratike, nismëtari dhe ndër themeluesit e saj në zonën e Kamzës.

Pikërisht për këto kontribute të pamohueshme, zoti Fran Babaj mori mandatin e parë në zgjedhjet lokale të verës së vitit 1992, duke u zgjedhur në mënyrë demokratike si Kryetari i parë i Komunës së Zall-Herrit të rrethit të Tiranës, si kandidaturë e Partisë Demokratike.

Ndërsa që prej vitit 2000 dhe deri në ditën e fundit të jetës së tij, Fran Babaj ishte Presidenti i Sindikatës së Pavarur të Artistëve, Gazetarëve dhe Sportistëve të Shqipërisë, sindikatë e cila vepron në kuadër të BSPSH-së. Fran Babaj ishte njeriu idealist dhe kërkonte më të mirën e mundshme nga puna, shoqëria dhe vetja e tij. Shoqëria humbi parakohe, artistin e palodhur dhe çdo ditë të frymëzuar, sindikalistin e përkushtuar dhe plot energji. Kemi humbur një zë të fuqishëm në mbrojtjen e kauzës sindikale të artit dhe gazetarisë. Miku ynë i mirë Fran Babaj ishte i çiltër, i drejtpërdrejtë dhe i hapur me të gjithë, por dhe i dashur dhe i ndjeshëm me këdo. Ai kishte shpirtin e ndihmës dhe të humanizmit. Fran Babaj ishte i mirë më të gjithë. Fran Babaj dhe hijeshia e tij e përditshme do të na mungojë të gjithëve sot e përgjithmonë.

Prandaj dhe u mblodhën së toku të gjithë miqtë e të afërmit për të ndarë me familjen e tij të dashur, dhimbjen e madhe për ndarjen nga jeta parakohe dhe krejt pa pritur…..por dhe me mirënjohjen për punët e mira dhe gjurmët pozitive që la në këtë jetë Fran Babaj.

Lamtumirë miku ynë i dashur Fran..!

U prefsh në paqe dhe qetësi..!

*Sekretar i përgjithshëm i Sindikatës së Pavarur të Artistëve, Gazetarëve dhe Sportistëve të Shqipërisë.